Yo‘l harakati xavfsizligi bosh boshqarmasi haydovchilikni endi boshlagan fuqarolar boshqarayotgan mashinalarda maxsus belgi bo‘lishi shartligi haqida 25-aprel kuni xabar tarqatdi.
YHXBBning Telegram-kanalida e’lon qilingan xabarda shunday deyiladi:
“Haydovchilikni endi boshlagan” – “Haydovchilik malakasi yetarli bo‘lmagan” haydovchilik staji 2 yildan kam bo‘lgan haydovchilar boshqarayotgan mexanik transport vositalarida undov (“❗️”) belgisining tasviri tushirilgan, sariq rangli, tomonlari 150 millimetr bo‘lgan kvadrat ko‘rinishidagi belgi bo‘lishi shart.Ammo Vazirlar Mahkamasining Yo‘l harakati qoidalarini tasdiqlash to‘g‘risidagi qarorida “Haydovchilikni endi boshlagan” taniqlik belgisi haydovchi xohishiga ko‘ra o‘rnatilishi mumkinligi qayd etilgan.
YHXBB 25-apreldagi xabarini o‘chirib tashlab, 26-aprel kuni yangi videoxabar chiqardi va unda avvalgi xabardagi xatosini tuzatib, maxsus belgini haydovchi xohishiga ko‘ra mashinaga o‘rnatish mumkinligi aytib o‘tildi.
Avvalroq O‘zbekistonda yangi tahrirdagi Yo‘l harakati qoidalari tasdiqlangani to‘g‘risida xabar berilgandi. Unga ko‘ra, avtomobil old o‘rindig‘ida o‘tirib xavfsizlik kamarini taqmagan yo‘lovchi jarimaga tortilishi mumkin, YPX xodimidan dislokatsiyani so‘rash talabi bekor qilingan.
Yangi tahrirdagi Yo‘l harakati qoidalari 2022-yil 1-maydan boshlab amalga kiritiladi.
Izoh (0)