“O‘zavtosanoat” bilan hamkorlik qiluvchi BYD eng nufuzli kompaniyalar ro‘yxatida Tesla’ni ortda qoldirdi

Time dunyodagi 100 ta eng nufuzli kompaniyalar ro‘yxatini e’lon qildi. Reytingda BYD Tesla’ni ortda qoldirdi. 

Dunyodagi eng yirik elektromobil ishlab chiqaruvchisi hisoblangan Amerikaning Tesla kompaniyasi ro‘yxatga kiritilmagan. Shu tariqa Xitoyning BYD kompaniyasi jurnalning eng nufuzli kompaniyalar ro‘yxatida Tesla’dan o‘tib ketdi.

Reytingda avtomobilsozlik sanoatining turli sohalarini qamrab oluvchi jami 6 ta brend keltirilgan. Bularga Ford Motor Company, BYD, EV Connect, Rivian, No Traffic va Opibus kiradi. 

Fevral oyida “O‘zavtosanoat” elektromobil ishlab chiqaruvchi BYD kompaniyasi bilan hamkorlik qilishini ma’lum qilgan edi. 

BYD — elektrotransportlar ishlab chiqarilishi bilan shug‘ullanuvchi dunyodagi eng yirik kompaniyalardan biri. Kompaniya nomi Build Your Dream (“O‘z orzungni yarat”) qisqartmasidan kelib chiqqan.

Kompaniya o‘z faoliyatini 1995-yilda mobil telefonlar uchun akkumulyator batareyalarini ishlab chiqarish bilan boshlagan.

BYD 2002-yili Tsinchuan Automobile Co Ltd.ni sotib olganidan so‘ng avtomobillar bilan shug‘ullanishni boshlagan. Birinchi shaxsiy ishlanma F3 modeli bo‘lgan edi.

“O‘zavtosanoat” va BYD ilk elektromobilni qachon ishlab chiqarishi mumkinligi ma’lum bo‘lgan edi. 

Unga ko‘ra, may oyida O‘zbekistonga Xitoydan sinov elektromobillar keltiriladi. Xaridorlarga qanday variantlar kerakligini tushunish uchun ular bilan car-clinic o‘tkaziladi. Ishlab chiqarish 2023-yilda boshlanishi rejalashtirilgan.