Time дунёдаги 100 та энг нуфузли компаниялар рўйхатини эълон қилди. Рейтингда BYD Tesla’ни ортда қолдирди.
Дунёдаги энг йирик электромобиль ишлаб чиқарувчиси ҳисобланган Американинг Tesla компанияси рўйхатга киритилмаган. Шу тариқа Хитойнинг BYD компанияси журналнинг энг нуфузли компаниялар рўйхатида Tesla’дан ўтиб кетди.
Рейтингда автомобилсозлик саноатининг турли соҳаларини қамраб олувчи жами 6 та бренд келтирилган. Буларга Ford Motor Company, BYD, EV Connect, Rivian, No Traffic ва Opibus киради.
Февраль ойида «Ўзавтосаноат» электромобиль ишлаб чиқарувчи BYD компанияси билан ҳамкорлик қилишини маълум қилган эди.
BYD — электротранспортлар ишлаб чиқарилиши билан шуғулланувчи дунёдаги энг йирик компаниялардан бири. Компания номи Build Your Dream («Ўз орзунгни ярат») қисқартмасидан келиб чиққан.
Компания ўз фаолиятини 1995 йилда мобил телефонлар учун аккумулятор батареяларини ишлаб чиқариш билан бошлаган.
BYD 2002 йили Tsinchuan Automobile Cо Ltd.ни сотиб олганидан сўнг автомобиллар билан шуғулланишни бошлаган. Биринчи шахсий ишланма F3 модели бўлган эди.
«Ўзавтосаноат» ва BYD илк электромобилни қачон ишлаб чиқариши мумкинлиги маълум бўлган эди.
Унга кўра, май ойида Ўзбекистонга Хитойдан синов электромобиллар келтирилади. Харидорларга қандай вариантлар кераклигини тушуниш учун улар билан car-clinic ўтказилади. Ишлаб чиқариш 2023 йилда бошланиши режалаштирилган.
Изоҳ (0)