Davlat xavfsizlik xizmati va Ichki ishlar vazirligi xodimlari hamkorligida o‘tkazilgan tezkor-qidiruv tadbirlari natijasida Toshkent shahrida faoliyat yurituvchi MCHJ tomonidan tegishli ruxsatnomaga ega bo‘lmasdan, fuqarolarni Toshkent—Dubay—Jidda yo‘nalishi orqali Umra ziyoratiga yuborish holati aniqlandi. Bu haqda DXX axborot xizmati xabar qildi.
Xususan, MCHJ xodimi X.A. Namangan viloyatida yashovchi ikki fuqaroning ishonchiga kirgan holda ularni 6200 dollar evaziga Umra safariga jo‘natishni va’da qilgani aniqlangan. U oldindan 3100 dollar olgan vaqtida ushlangan.
Tezkor tadbir davom ettirilib, MCHJ ofisi va xodimlarining avtomashinalari tekshirilgan. Natijada jami 116 nafar fuqaroning xorijga chiqish pasportlari borligi aniqlanib, protsessual tartibda rasmiylashtirib olingan.
Shuningdek, 66 nafar fuqaroni Umra safariga yuborish maqsadida ulardan jami 162 ming dollar olingani ham ma’lum bo‘lgan.
MCHJ o‘z mijozlarini Birlashgan Arab Amirliklari va Saudiya Arabistoni Qirolligi o‘rtasidagi davlat chegarasidan o‘tkazishda Markaziy Osiyo respublikalarining soxta fuqarolik pasportlaridan foydalanish mexanizmini yo‘lga qo‘ygan.
Hozirda holat yuzasidan MCHJ mas’ullariga nisbatan Jinoyat kodeksining tegishli moddasi bilan qo‘zg‘atilgan jinoyat ishi doirasida tergov harakatlari olib borilmoqda.
Mavzuga doir:
- Toshkentda 2,2 ming dollar evaziga fuqarolarni soxta pasportlar yordamida Umra ziyoratiga jo‘natib kelganlar ushlandi
- Farg‘ona va Buxoroda chet elga viza tayyorlab berishni va’da qilib, fuqarolar pulini firibgarlik yo‘li bilan olgan shaxslar ushlandi
- Namanganda 20 dan ortiq fuqaroni Janubiy Koreyaga jo‘natishni va’da qilib, 6200 dollar olgan shaxs ushlandi
Izoh (0)