Toshkentda 2,2 ming dollar evaziga fuqarolarni soxta pasportlar yordamida Umra ziyoratiga jo‘natib kelganlar ushlandi

DXX tomonidan tashkillashtirilgan tezkor tadbirda O‘zbekiston fuqarolariga soxta pasport tayyorlab berib, ularni Umra ziyoratiga jo‘natish bilan shug‘ullanib kelgan shaxslar qo‘lga olindi.

Ma’lum bo‘lishicha, Tojikiston va Qirg‘iziston fuqarolari bilan til biriktirgan bir guruh shaxslar, Umra ziyoratiga bormoqchi bo‘lgan o‘zbekistonliklarni Qozog‘istonning soxta fuqarolik pasportlarini tayyorlash orqali 2,2 ming dollar evaziga muntazam ravishda ziyoratga jo‘natish bilan shug‘ullanib kelgan.

Ular bu ishni Saudiya Arabistoni tomonidan qozog‘istonliklar uchun soddalashtirilgan kirish rejimi — elektron viza joriy qilinganidan foydalanib, amalga oshirgan.

Toshkent xalqaro aeroportida 40 nafar o‘zbekistonlikni Umra ziyoratiga soxta pasport tayyorlab, olib ketayotganlar qo‘lga olingan. Shuningdek, ziyoratga ketayotgan 40 nafar o‘zbekistonlikning 10 yilga xorij mamlakatiga kirishiga taqiq qo‘yilgan.

“Uch kundan beri Dubaydamiz. Guruhimiz 30 kishidan iborat edi. Aeroportga kelganimizda qo‘limizdagi hujjatlar qalbaki ekani aniqlandi. Shu bo‘yi Madinaga uchib ketganimiz yo‘q”, — deydi aldanganlardan biri.

Holat yuzasidan Jinoyat kodeksining tegishli moddalari bilan jinoyat ishi qo‘zg‘atilib, tergov harakatlari olib borilmoqda.

Avvalroq O‘zbekistonda Umra ziyorati qachondan boshlanishi va uning narxlari haqida ma’lumot berilgandi. Unda 2020-yil fevral oyiga qadar Umra ziyorati uchun oxirgi belgilangan to‘lovlarni amalga oshirganlar qo‘shimcha ravishda 4 770 000 so‘m mablag‘ to‘lashi ham keltirib o‘tilgan edi. Ijtimoiy tarmoqlarda ushbu qo‘shimcha to‘lov borasida turli mulohazalar bildirilganidan so‘ng, Musulmonlar idorasi holatga izoh berib, koronavirus pandemiyasi Umra xizmatlari ko‘rsatishga ham salbiy ta’sir ko‘rsatganini ma’lum qildi. Qayd etilishicha, mehmonxonada 4 kishilik xonaga 2 nafar ziyoratchi, 50 o‘rindiqli avtobusga 25 kishi joylashtirish kabi talablar o‘rnatilgan. 22-yanvar kuni erta tongda Umra—2022 mavsumining ilk ziyoratchilari Toshkent xalqaro aeroportidan Saudiya Arabistoniga jo‘nab ketgandi.

Eslatib o‘tamiz, Saudiya Arabistoni hukumati chet elliklar kichik haj — Umra ziyoratini amalga oshirish uchun 10-avgustdan qirollikka kirishi mumkinligini e’lon qilgan edi. Ziyoratchilar qirollikda tasdiqlangan Pfizer, Moderna, Johnson & Johnson, AstraZeneca vaksinalaridan biri bilan emlangan bo‘lishi yoki manfiy javobli PZR-testni taqdim etishi kerak. Vaksina olmagan ziyoratchilar mamlakatga kelganidan keyin uch kunlik karantindan o‘tib, so‘ng koronavirusga nisbatan qaytadan PZR-test topshiradi.