Rossiya qo‘shinlarining Ukrainadagi harbiy operatsiyasining ikkinchi bosqichi vazifasi Donbass va Janubiy Ukraina ustidan to‘liq nazoratni o‘rnatish hamda Qrimga quruqlik orqali koridorni ta’minlashdan iborat. Bu haqda 22-aprel kuni Markaziy harbiy okrug qo‘shinlari qo‘mondoni vazifasini bajaruvchi Rustam Minnekayev Sverdlov viloyatidagi Mudofaa sanoati korxonalari ittifoqining yig‘ilishida ma’lum qildi, deb xabar beradi “Interfaks”.
“Maxsus operatsiyaning ikkinchi fazasi boshlanganidan beri, u ikki kun oldin boshlandi, Rossiya armiyasining vazifalaridan biri — Donbass va Janubiy Ukraina ustidan to‘liq nazoratni o‘rnatish. Bu Qrimga quruqlik orqali koridorni ta’minlaydi, shuningdek, Ukraina iqtisodiyoti uchun o‘ta muhim obyektlarga ta’sir ko‘rsatadi”, — deydi Minnekayev.
Shu bilan birga, uning ta’kidlashicha, Ukraina janubini nazoratga olish “rusiyzabon aholiga zulm qilish faktlari ham mavjud” Pridnestrovyega (Moldova va Ukraina bilan chegaradosh G‘arbiy Yevropadagi tan olinmagan respublika) chiqish imkonini beradi.
“Aftidan, biz hozirda butun dunyoga qarshi urushyapmiz, Ikkinchi jahon urushida bo‘lgani kabi butun Yevropa, butun dunyo bizga qarshi. Ular hech qachon Rossiyani yaxshi ko‘rmagan, hozir ham shu”, — deya qo‘shimcha qiladi harbiy.
Avvalroq o‘zini o‘zi respublika deb e’lon qilgan Donetsk Xalq Respublikasi xalq militsiyasi vakili Eduard Basurin maxsus guruhlar Mariupoldagi “Azovstal” metallurgiya zavodiga hujumni boshlaganini ma’lum qilgandi. Zavodda ayollar va bolalar borligi haqida avvalroq Ukraina dengiz korpusining 36-alohida brigadasi komandiri mayor Sergey Volin gapirgan edi. Keyinroq Rossiya prezidenti Vladimir Putin Mariupoldagi sanoat zonalariga hujumni bekor qilishni buyurdi.
Izoh (0)