Putin Mariupoldagi “Azovstal”ga hujumni bekor qilishni buyurdi

Rossiya prezidenti Vladimir Putin Mariupoldagi sanoat zonalariga hujumni bekor qilishni buyurdi. Uning hisoblashicha, bu maqsadga muvofiq emas. Bu haqda Putin mudofaa vaziri Sergey Shoygu bilan uchrashuvda ma’lum qildi, deb xabar beradi “Interfaks”.

“Hozir biz askar hamda ofitserlarimizning hayoti va sog‘lig‘ini saqlab qolishni o‘ylashimiz kerak bo‘lgan vaqt (ya’ni bu haqda doim o‘ylashimiz kerak, hozir ayniqsa). Ushbu sanoat obyektlari ostidagi katakombalarga (chalkash yo‘llar — tahr.) tushib, emaklash kerak emas”, — deydi Putin.

“Mazkur sanoat zonasini hatto pashsha ham uchib o‘ta olmaydigan qilib, bloklab qo‘ying”, — deya qo‘shimcha qilgan prezident.

Shoygu Putin bilan uchrashuvda “Azovstal”dan boshqa butun Mariupol Rossiya qo‘shinlari tomonidan nazoratga olinganini ma’lum qilgan. “Azovstal”ga ikki mingga yaqin ukrainalik harbiy xizmatchilar yashiringan. Vazirning qo‘shimcha qilishicha, zavod hududi qurshovga olingan.

Avvalroq o‘zini o‘zi respublika deb e’lon qilgan Donetsk Xalq Respublikasi xalq militsiyasi vakili Eduard Basurin maxsus guruhlar Mariupoldagi “Azovstal” metallurgiya zavodiga hujumni boshlaganini ma’lum qilgandi. Zavodda ayollar va bolalar borligi haqida avvalroq Ukraina dengiz korpusining 36-alohida brigadasi komandiri mayor Sergey Volin gapirgan edi.

Rossiya harbiylari Mariupolda ukrainalik askarlarga taslim bo‘lishni bir necha bor taklif qilgan. 17-aprel kuni Rossiya Mudofaa vazirligi vakili Igor Konashenkov yana bir bor “Azovstal” hududida bo‘lgan “jangarilarga” qurollarini topshirishni taklif qildi. Uning so‘zlariga ko‘ra, zavodda 2500 dan ortiq jangchi, jumladan, 400 ga yaqin xorijlik yollanma askar qamalda qolgan. Konashenkov, “qarshilik davom etsa, ularning barchasi yo‘q qilinishini” aytdi.