“Ozarbayjon o‘z manfaatlari hisobga olinmasa, Armanistonning hududiy yaxlitligini tan olmaydi” — Ilhom Aliyev

Ozarbayjon prezidenti Ilhom Aliyevning aytishicha, agar Armaniston Ozarbayjon Respublikasining yaxlitligini tan olmasa, Boku ham Armanistonning hududiy yaxlitligini tan olishdan bosh tortadi. Aliyev vaziyatni hal qilish uchun muzokara boshlashga chaqirdi.

“Agar Armaniston Ozarbayjonning hududiy yaxlitligini tan olmasa, Ozarbayjon ham Armanistonning hududiy yaxlitligini tan ololmaydi”, — deb tushuntirdi Aliyev Shushadagi “Dunyo ozarbayjonlarining V qurultoyi”dagi chiqishida.

U arman tomonini tinchlik shartnomasini tuzish uchun “konkret muzokaralar olib borishga” chaqirdi, biroq Ozarbayjon “o‘z hududini hech kimga bermasligini” va Bokuning manfaatlari hisobga olinmagan bitimni imzolamasligini ta’kidladi. . “Ishonchim komilki, mojarodan keyingi davrda amalga oshirgan harakatlarimiz natijasida biz Armaniston va dunyo armanlarining Ozarbayjonga nisbatan hududiy da’volarini bartaraf qilamiz”, — dedi Aliyev.

Armaniston—Ozarbayjon munosabatlarida nisbatan normallashuv alomatlariga qaramay, mamlakatlar Tog‘li Qorabog‘ maqomi borasida hamon tortishuvlarga duch kelmoqda. Mart oyi oxirida Qorabog‘dagi navbatdagi keskinlashuv fonida Armaniston va Ozarbayjon yetakchilari muzokara o‘tkazish uchun Bryusselda  uchrashgandi.