“Iqtisodiy sharh” jurnali tahririyati 2022-yilning aprel oyida O‘zbekistonda aholiga taqdim etilayotgan eng daromadli iste’mol kreditlari haqida umumiy ma’lumot tayyorladi.
Markaziy bankning asosiy stavkasi ko‘tarilganidan keyin banklar iste’mol kreditlari bo‘yicha foizlarni oshirdi. Maksimal miqdori — 540 mln so‘m.
O‘tgan yilning oktabr oyidagi sharh bilan solishtirganda, o‘rtacha yillik stavka joriy yilning aprel oyida 25 foizdan 29 foizgacha — 4 foizga oshdi. Majburiy talab — sotib olingan tovarlar O‘zbekistonda ishlab chiqarilgan bo‘lishi kerak.
Iste’mol krediti — faqat O‘zbekistonda ishlab chiqarilgan tovarlar va xizmatlarni sotib olishga bo‘lgan ehtiyojlarni qondirish maqsadida taqdim etiladigan kredit.
Iste’mol kreditlari sotib olingan tovar yoki xizmatlar summasining 100 foizigacha beriladi. Iste’mol kreditining obyekti jismoniy shaxsning iste’mol ehtiyojlari uchun mo‘ljallangan O‘zbekistonda ishlab chiqarilgan tovarlar (ishlar, xizmatlar) bo‘lishi mumkin.
Bugungi kunda O‘zbekistonda 32 ta bank faoliyat ko‘rsatmoqda.
Iste’mol kreditlarini berish va ularni qaytarish milliy valyuta — so‘mda amalga oshiriladi. Tadqiqot shuni ko‘rsatdiki, O‘zbekistondagi 32 ta bankdan iste’mol kreditlari faqat 19 ta bank tomonidan berilmoqda.
Markaziy bankning 2021-yil uchun statistik ma’lumotlariga ko‘ra, banklar tomonidan iste’mol kreditlari uchun jami 9,6 trln so‘m ajratilgan.
Quyidagi banklar aholiga iste’mol kreditlari bermaydi: “Agrobank”, “Asakabank”, “O‘zsanoatqurilishbank”, “Aloqabank”, “Tenge bank”, “Davr bank”, TBC bank, “Kapitalbank”, “O‘zagroeksportbank”, “Anorbank”, “Turkiston bank”, “Madad Invest Bank”, “KDB Bank O‘zbekiston”.
Hisob-kitoblarga ko‘ra, “Ziraat bank” iste’mol kreditlari bo‘yicha reytingning yetakchisiga aylandi. Bu yerda quyidagi shartlar asosida kredit olish uchun ariza berish mumkin bo‘ladi: 36 oygacha yillik foiz stavkasi 25,5 foiz va maksimal miqdori 81 mln so‘m.
Iste’mol kreditlari reytingiga ko‘ra, “Eron Saderat bank” 2-o‘rinni egalladi, bu yerda uch yil muddatga 26 foiz yillik stavkada va eng katta miqdorda, ya’ni 540 mln so‘mgacha kredit rasmiylashtirish mumkin bo‘ladi.
“Qishloq qurilish bank” reytingda 3-o‘rinni egalladi va quyidagi tartibda iste’mol kreditlarini: yillik foiz stavkasi 27 foiz, maksimal miqdori 135 mln so‘m va 60 oygacha bo‘lgan muddatga taqdim etmoqda.
Bundan tashqari, iste’mol kreditlari bo‘yicha eng yuqori foiz stavkalari “Invest Finans bank” (37,99 foiz) va “Hamkorbank” (38 foiz) kabi banklar tomonidan ajratilmoqda.
Kreditlar bo‘yicha ma’lumotlar sharh e’lon qilingan vaqt uchun mavjud. Kredit shartlari o‘zgarishi mumkin.
Avvalroq O‘zbekistonda tijorat banklariga 300 mln dollarlik kredit liniyasi ajratilgani haqida xabar berilgan edi.
Izoh (0)