“Qulupnaylar xodimlar tomonidan to‘kib tashlanmagan”. IIV Yuqori Chirchiqda qulupnay sotuvchi ayollar bilan sodir bo‘lgan voqea bo‘yicha ma’lumot berdi

Ijtimoiy tarmoqlarda qulupnay sotuvchi ayollar IIB binosiga qamab qo‘yilgani, ularning sotish maqsadida ko‘chaga olib chiqqan qulupnaylari olib qo‘yilib uzoq vaqt saqlangani uchun yaroqsiz holga kelgani tasvirlangan video tarqaldi. Ichki ishlar vazirligi holat aslida qanday bo‘lgani to‘g‘risida lavha tayyorlab, ijtimoiy tarmoq faollari voqeani boshqacha talqin qilayotganini ma’lum qildi.

Toshkent viloyatining Yuqori Chirchiq tumanida yo‘lning qatnov qismida, harakat xavfsizligiga xalaqit berib qulupnay savdosi bilan shug‘ullanayotgan fuqarolarning jamoat xavfsizligini ta’minlash maqsadida jalb etilgan ichki ishlar organlari xodimlariga qarshilik ko‘rsatib, janjal uyushtirganliklari aks etgan videolari tarqalmoqda. Internet foydalanuvchilari IIB xodimlari sotuvchilarning qulupnaylarini to‘kib tashlagani yoki yaroqsiz holatga keltirganini aytmoqda.

IIV tomonidan tayyorlangan lavhada ma’lum qilinishicha, voqea sodir bo‘lgan kuni ichki ishlar xodimlari sotuvchilardan serqatnov avtomobil yo‘lida savdo qilmaslikni, bu yo‘l-transport hodisalarini yuzaga keltirishi mumkinligini aytgan.

“Ikki nafar ayolning oldiga borganimizda bizning ogohlantirishimizga qaramasdan, ichki ishlar xodimining qonuniy talabini bajarmasdan, savdo-sotiqni to‘xtatmadi. Tarozisini mashina olib qo‘yayotganimizda Elmira ismli sotuvchi avtomobilimizga yopishib, mashina kalitini olib qo‘ydi”, — deydi Yuqori Chirchiq IIB xodimi Sherzod Ahmadov.

Ta’kidlanishicha, bu orada vaziyatdan to‘liq xabardor bo‘lmagan boshqa sotuvchilar jarayonga aralashib, holatni tasvirga olgan holda ularning xizmat faoliyatiga faol qarshilik ko‘rsatgan.

O‘sha kuni IIO xodimlarining qonuniy talablariga bo‘ysunmagan va faol qarshilik qilgan fuqarolar tuman IIBga olib kelingan va tushuntirish ishlari olib borilgan. Holat yuzasidan tegishli hujjatlar rasmiylashtirilgan.

IIB xodimining aytishicha, sotuvchi Elmira tarozini olishga borganida uning qaynonasi qulupnay turgan peshtaxtaga turtilib ketgan va to‘rtta idishdagi meva to‘kilib ketgan. “Xodimlar tomonidan qulupnaylarni otib tashlash, yerga tepish holatlari bo‘lmadi”, — deydi ichki ishlar mas’uli.

IIV axborot xizmati rahbari Shohrux G‘iyosov mazkur voqeani izohlar ekan, buni hodisalarni bo‘rttirish va ichki ishlar organlari xodimlarini yomonotliq qilib ko‘rsatishga shaylangan “jamoatchilik vakillari”ning ishi deya baholagandi.

“Bunday hodisalarni bo‘rttirish va ichki ishlar organlari xodimlarini yomonotliq qilib ko‘rsatishga shaylangan ‘jamoatchilik vakillari’ faollashganini inobatga olib, haqiqiy jamoatchilik nazorati subyektlaridan yo‘l yoqalaridagi tartibsiz savdo-sotiq bilan bog‘liq muammolar, ular ortidan kelib chiqayotgan yo‘l-transport hodisalari va hokazo masalalarga ko‘proq e’tibor qaratishlarini maqsadga muvofiq deb hisoblaymiz”, — degan u.