Darren Bent “Tottenhem”ga qarshi
APLning 2005/06-yilgi mavsumida “Charlton” hujumchisi Darren Bent 36 o‘yinda 18 ta gol urdi va Tyerri Anri (27), Ruud van Nistelroydan (21) keyin uchinchi eng yaxshi to‘purarga aylandi. Yorqin o‘yin namoyish etgan futbolchi “Tottenhem” e’tiborini qozonadi. “Shporlar” 2007-yilda futbolchi bilan 6 yillik shartnoma imzolaydi. Bir yildan so‘ng London jamoasida Harri Rednapp bosh murabbiyga aylanadi. Mutaxassis Bentni ochiqchasiga tanqid qilar edi. “Portsmut”ga qarshi o‘yinda (2008/09-yilgi mavsum, o‘yin 1:1 hisobi bilan yakunlangan) Darren raqib darvozasiga yaqin turgan bo‘lsa-da, boshi bilan to‘pni noaniq yo‘naltiradi. Rednapp ushbu vaziyat borasida: “Mening rafiqam ham bu yerdan gol urardi”, deya fikr bildiradi. Futbolchi g‘azabini ichiga yutadi.
2009-yilda “Sanderlend” Bentni xarid qiladi. “Tottenhem” esa uning o‘rniga Roman Pavlyuchenko va Jermeyn Defoni olib keladi. O‘sha mavsumning 33-turida “Sanderlend” o‘z uyida “Tottenhem”ni qabul qiladi. Uchrashuvning birinchi daqiqasidayoq Darren Bent “shporlar” darvozasini ishg‘ol qiladi va tribunaga qarata “jim turish” ishorasini ko‘rsatadi. 29-daqiqada esa penaltini aniq amalga oshirib, uni ham nishonlaydi. O‘yin 3:1 hisobida “Sanderlend”ning g‘alabasi bilan yakunlanadi.
2009/10-yilgi mavsum oxirigacha Bent 24 ta gol uradi, “Tottenhem”ning yangi futbolchisi Defo esa 18 ta golni o‘z hisobiga yozdirib qo‘ydi. Darren Rednappga ayta olmagan gaplarini natijalari orqali ko‘rsatdi.Mario Balotelli “Nitssa”ga qarshi
“Super Mario” “Nitssa”da majoziy ma’noda “qayta tug‘ildi”. 2016-yilda erkin agent sifatida “Liverpul”dan Fransiyaga ko‘chib o‘tgan futbolchi 3 yil mobaynida 76 ta o‘yinda ishtirok etib, 43 ta golni o‘z hisobiga yozdirib qo‘ydi.
2018/19-yilgi mavsum oldidan “Nitssa” bosh murabbiyi Lusyen Favr o‘rnini Patrik Viyeyra egalladi. Mario Balotelli ham jamoadan ketish istagini bildirdi. Ammo “Marsel”ga amalga oshishi kerak bo‘lgan transfer barbod bo‘ldi. Futbolchining bundan jahli chiqdi. Mashg‘ulotlarga kech boradigan odat chiqardi, ortiqcha vazn yig‘di. Bosh murabbiy Mario bilan suhbatlashib oldi. Balotelli yana tarkibga qaytdi va 10 ta o‘yinda ishtirok etib, birorta golli vaziyatda qatnashmadi.
2018-yil dekabr oyida, zaxiraga olinayotgan Mario murabbiyga jahl qildi. Bu esa oxirgi nuqta edi. 2019-yilning 23-yanvarida futbolchi “Marsel” bilan shartnoma imzoladi. Mart oyida esa “Nitssa”ga qarshi maydonga tushdi. 61-daqiqada gol urgan Balotelli golni maydon chetiga borib, jamoadoshi bilan “tosh, qog‘oz, qaychi” o‘yinini o‘ynagan holda nishonladi.Rahim Sterling “Liverpul”ga qarshi
2012-yilda Rahim Sterling “Liverpul” safida debyut qiladi. Mersisaydliklar yosh futbolchi jamoaning kelajagi ekaniga shubha qilmaydi. Lekin Rahim yangi shartnoma borasida “Liverpul” bilan kelisha olmaydi. Jamoa futbolchining maoshini ikki baravar oshirib berishni va’da qiladi. Shu orada shayxlar xo‘jayinlik qiladigan “Manchester Siti” Sterling uchun juda katta maosh to‘lash istagini bildiradi. 2015-yilda angliyalik futbolchi “shaharliklar” tarkibiga o‘tadi.
Sterling Manchesterga ko‘chib o‘tgandan so‘ng bergan dastlabki intervyularidan birida “Men bolaligimdan APL chempioni bo‘lishni orzu qilganman. Shuning uchun ‘Manchester Siti’ga o‘tdim”, deb aytib o‘tadi. Bu esa “qizillar” muxlislarini g‘azabga keltiradi. Mana yillar mobaynida “Enfild”da Sterlingga nisbatan hushtakbozlik uyushtirib kelinadi. Rahim esa sobiq jamoasiga qarshi o‘yinlar gol ura olmasdi. Ammo 2019-yilga kelib, bu istagi amalga oshdi. Angliya Superkubogi doirasida “Manchester Siti” “Liverpul”ga qarshi bahs olib bordi. Sterling markaziy hujumchi pozitsiyasida o‘yinni boshladi va 12-daqiqada Alisson darvozasini ishg‘ol qildi. Darvozadan joy olgan to‘pning yoniga borib, unga yana bir marta zarba bergan Sterling o‘yindan so‘ng “Ularga gol urganimdan xursandman”, deb javob berdi.
Mashmashali ketishidan 5 yil o‘tib, Sterling sobiq jamoasidan “qasos oldi”.Denni Uelbek “Manchester Yunayted”ga qarshi
Denni Manchesterga Ganadan ko‘chib kelgan immigrantlar oilasida tug‘ilgan. 2005-yilda “Manchester Yunayted” akademiyasiga qabul qilingan. 2006-yilda esa asosiy jamoada debyutini o‘tkazishga muvaffaq bo‘ladi. Shundan keyin turli mavsumlarda turlicha ko‘rsatkichlar qayd etib kelgan hujumchi 2014-yilda jamoadan ketishiga to‘g‘ri keladi. “Qizil iblislar”ning yangi murabbiyi Lui van Gal Uelbekka ochiqchasiga “Sen asosiy tarkibga kirish uchun yetarlicha yaxshi futbolchi emassan”, deb aytadi. 23 yoshli futbolchi uchun bu qattiq zarba edi.
Denni 2014-yil 1-sentabr kuni “Arsenal” bilan shartnoma imzolaydi. Londonliklar safidagi ilk mavsumidayoq Angliya Kubogi doirasida “Manchester Yunayted” darvozasini ishg‘ol qiladi (2:1). G‘alaba golini urgan Uelbek golni xursandchilik bilan nishonlaydi. “Arsenal” 2014/15-yilgi mavsumda Angliya Kubogini qo‘lga kiritadi.Serxio Ramos “Sevilya”ga qarshi
Serxio “Sevilya” akademiyasi tarbiyalanuvchisi. 2004/05-yilgi mavsumda himoyachi asosiy jamoada debyutini o‘tkazadi. Mavsum so‘ngida esa “chempionat kashfiyoti” deya e’tirof etiladi. “Sevilya”da atigi bir mavsum o‘ynagan bo‘lsa-da, Ramos muxlislarning yoqimtoyiga aylanadi. 19 yoshli futbolchiga bir nechta jamoa qiziqish bildira boshladi. “Sevilya”ning sobiq prezidenti Xose Mariya del Nido futbolchiga 12—15 million yevro atrofida pul taklif qilinsa, sotishga qarshi emasligini bildirdi. Madridning “Real” jamoasi Serxio Ramosni qo‘lga kiritish uchun jiddiy harakat qila boshladi. Buni kuzatib turgan prezident futbolchining tovon pulini to‘lagan jamoaga qo‘yib yuboramiz, deb aytib o‘tadi. Serxio Ramosning o‘sha paytdagi tovon puli — 27 million yevro edi. Del Nidoning ushbu xatti-harakatlari Ramosga yoqmaydi. 2005-yil 31-avgust kuni u “Real” bilan shartnoma imzoladi.
Shundan so‘ng Serxio “Sevilya” darvozasini har safar ishg‘ol qilganda, golni nishonlashni an’anaga aylantirib oldi. Intervyularidan biri Ramos: “Bu yerga Rakitich yoki Dani Alves kelganda, muxlislar ularni iliq kutib oladi. Men kelganda esa o‘zim va oilamni haqorat qilishadi”, deb ochiqchasiga aytib o‘tgan edi. Albatta, Ramosning har safar golni nishonlashi muxlislarga ham yoqmaydi. Chunki himoyachi jamoadan ketayotgan vaqtda “Sevilya” butun umr yuragida qolishini ta’kidlagan. Lekin “Real” safida “Sevilya” darvozasi tomon yo‘llangan 7 ta to‘pini ham Ramos nishonlagan. Buni esa muxlislar kechira olmaydi.Anxel di Mariya “Manchester Yunayted”ga qarshi
Argentinalik futbolchi 2014-yilda “Real”dan “Manchester Yunayted”ga o‘tadi. Angliya jamoasi di Mariyani o‘sha vaqtdagi o‘zi uchun rekord narx: 59,7 million yevroga xarid qiladi. Ammo Anxel mankunianliklar safida muvaffaqiyatsiz harakat qiladi. Bosh murabbiy Lui van Gal bilan kelishmovchiliklar ham di Mariyaning Manchesterni tark etishiga sababchi bo‘ladi.
2015-yil 6-avgustda argentinalik yulduz “PSJ” bilan shartnoma imzolaydi. Di Mariyaning Parijdagi do‘stining aytishicha, “Manchester Yunayted”ning o‘yini boshlansa, u darhol televizorni o‘chirib qo‘yishni so‘ragan.
2018/19-yilgi mavsum Chempionlar Ligasining nimchorak finalida “PSJ” “Manchester Yunayted” bilan to‘nash keladi. “Old Trafford”dagi muxlislar di Mariyaga turli buyumlar uloqtiradi. Mankunianliklar futbolchisi Eshli Yang esa tezlikda yugurib ketayotgan di Mariyani maydon chetiga itarib yuboradi. Bundan g‘azablangan Anxel 53-daqiqada burchak zarbasidan to‘p oshirib, Kimpembening goliga assistentlik qiladi. Golni jamoadoshlari bilan birga nishonlagan argentinalik, tribunadagi muxlislarga nomaqbul so‘zlar bilan murojaat qiladi. Oradan 7 daqiqa o‘tib, Kilian Mbappening gol urishiga ham yordamlashadi. Anxel o‘ziga nisbatan hurmatda bo‘lmagan jamoaga o‘ziga xos javob qaytaradi.Luis Suares “Barselona”ga qarshi
Luis Suares 2014-yilda “Barselona”ga o‘tgan. Lionel Messi, Neymar bilan birgalikda ajoyib uchlik hosil qilib, qo‘lga kiritish mumkin bo‘lgan barcha sovrinlarga ega chiqqan. Kataloniyadagi 6 yili mobaynida urugvaylik hujumchi 284 ta o‘yinda 198 ta golga mualliflik qilgan.
Ronald Kuman “Barselona” bosh murabbiyiga aylangach, jamoada jiddiy o‘zgarishlar qilmoqchi ekanligini aytdi. Luis Suares ham niderlandiyalik mutaxassisning rejalariga kirmadi va jamoani tark etishga majbur bo‘ldi. 2020-yil 24-sentabrda “Atletiko” bilan erkin agent sifatida shartnoma imzolagan Suares o‘sha mavsumning o‘zida madridliklar bilan Ispaniya chempioniga aylandi. 2021/22-yilgi mavsumda esa La Liganing 8-turi doirasida “Atletiko” o‘z uyida “Barselona”ni qabul qildi. Uchrashuvning 44-daqiqasida Luis Suares sobiq jamoasiga gol urdi. To‘g‘ri, Suares ushbu golni nishonlamadi, lekin qo‘lini telefon shakliga keltirib, “salom yo‘lladi”. Suaresning o‘zi bu ishora bolalariga qaratilgani, u farzandlari bilan shu tariqa hazillashishini aytib o‘tgan bo‘lsa-da, aslida bu Ronald Kumanga qaratilganini ko‘pchilik tushundi. Kuman va Suares o‘rtasidagi telefon suhbatidan keyin Luisning katalon klubini tark etishi aniq bo‘lgandi. Suares esa shu tariqa Kumandan “qasos oldi”.
Izoh (0)