Oppo kompaniyasi uchtalik kameraga ega hamyonbop smartfonini taqdim etdi, deb xabar beradi Hi-Tech.Mail.ru.
Oppo A55s 5G nomini olgan smartfon HD+ sifatni qo‘llab-quvvatlovchi, 60 gertsli tasvir yangilanish chastotasiga va 480 nit yorug‘likka ega 6,5 dyuymli IPS-ekran bilan jihozlangan. Old qismidagi tomchisimon qirqimiga 8 megapikselli frontal kamera o‘rnatilgan.
Smartfon sakkiz yadroli Dimensity 700 protsessori, 6/8 gigabaytli tezkor va 128 gigabaytli ichki xotira yordamida ishlaydi. Ichki xotirani microSD yordamida kengaytirish mumkin. Operatsion tizim sifatida Android 11 ning ColorOS 11.1 versiyasidan foydalanilgan. Xavfsizlikka yon tomonidagi barmoq izi skaneri javob beradi.
Qurilma sig‘imi 5000 mA/soatli akkumulyator bilan jihozlanganiga qaramay, u faqatgina 10 vattli quvvatlanish funksiyasiga ega. Orqa kamerasi 13 megapikselli asosiy datchik va ikkita 2 megapikselli — chuqurlikni o‘lchovchi va makro suratga olishga mo‘ljallangan datchiklardan iborat.
Smartfon Xitoyda 1099 yuandan (172 dollar) sotuvga chiqqan. Hozircha uning boshqa davlatlarda ham sotuvga chiqish-chiqmasligi noma’lum.
Avvalroq Honor kompaniyasi Xitoyda 5G’ga ega o‘zining eng ingichka smartfonini sotuvga chiqargani to‘g‘risida xabar berilgandi.
Izoh (0)