Samarqand viloyatining olis hududi hisoblangan Qo‘shrabot tumani markaziy shifoxonasida to‘xtatilgan yurakda ochiq jarrohlik amaliyoti bajarildi. Bunday amaliyot respublikada ilk bor tuman miqyosida yuqori texnologik kardiojarrohlik amaliyoti hisoblanadi, deya xabar berdi “Daryo” muxbiri.
2022-yilning aprel oyi boshida Samarqand viloyati kardiologiya markazining malakali mutaxassislari Qo‘shrabotga kelib, bir hafta davomida tibbiy ko‘rik tashkil etgan.
O‘tkazilgan tadbirlar davomida tumanning 1200 nafar fuqarosi birlamchi skriningdan o‘tkazilgan. Shundan, 300 nafar fuqaroda turli xil yurak-qon tomir kasalliklari aniqlanib, 57 nafarida kardioxirurgik amaliyot o‘tkazilishi rejalashtirilgan.
Skrining ko‘riklar vaqtida kechiktirib bo‘lmaydigan, shoshilinch kardioxirurgik amaliyotga muhtoj besh nafar fuqaro tanlab olinib, ularning uch nafari bir kunda operatsiya qilingan.
Xususan, tekshiruv jarayonida Qo‘shrabod tumani “Quvkalla” mahallasida yashovchi Munisa Ahmedovaning qizida yurak nuqsoni aniqlangan. Aniqlangan kasallik operatsiya orqali bartaraf etilishi sababli shifokorlarning tavsiyasi asosida Munisa Ahmedovaning qizi operatsiya qilingan.
“O‘tgan yili katta qizimning yuragida ham nuqson aniqlangandi. Afsuski, uni viloyat markaziga olib borishga mablag‘imiz yo‘q edi. Bugun viloyatdan shifokorlar kelib, hammasini o‘zlari qilishyapti”, — deydi Munisa Ahmedova.
Samarqand viloyat kardiologiya markazi bosh shifokori Maqsud Saidovning ma’lum qilishicha, endilikda nafaqat bugungi besh nafar bemor, balki ko‘rikda aniqlangan, yurak operatsiyasiga muhtoj bo‘lgan 57 nafar qo‘shrabotlikning barchasida shu yerning o‘zida jarrohlik amaliyoti bajarilib, sog‘lomlashtiriladi. Viloyat kardiologiya markazi shifokorlari har shanba kuni shu hududda operatsiya o‘tkazadi. Shuningdek, qo‘shrabotlik shifokorlarning viloyat markazida malaka oshirishi yo‘lga qo‘yilib, kelgusida ushbu operatsiyalarni mahalliy jarrohlar amalga oshirishi rejalashtirilgan.
Mavzuga doir:
- Qashqadaryoda birinchi marta o‘tkazilgan buyrak ko‘chirish operatsiyasida 43 yoshli aka buyragi 41 yoshli bemor singilga o‘tkazildi
- Buxoroda birinchi marta o‘tkazilgan buyrak ko‘chirish operatsiyasida ota o‘g‘liga donorlik qildi
- Farg‘onada ilk bor o‘tkazilgan buyrak ko‘chirish operatsiyasida er xotiniga donorlik qildi
Izoh (0)