Самарқанд вилоятининг олис ҳудуди ҳисобланган Қўшработ тумани марказий шифохонасида тўхтатилган юракда очиқ жарроҳлик амалиёти бажарилди. Бундай амалиёт республикада илк бор туман миқёсида юқори технологик кардиожарроҳлик амалиёти ҳисобланади, дея хабар берди «Дарё» мухбири.
2022 йилнинг апрель ойи бошида Самарқанд вилояти кардиология марказининг малакали мутахассислари Қўшработга келиб, бир ҳафта давомида тиббий кўрик ташкил этган.
Ўтказилган тадбирлар давомида туманнинг 1200 нафар фуқароси бирламчи скринингдан ўтказилган. Шундан, 300 нафар фуқарода турли хил юрак-қон томир касалликлари аниқланиб, 57 нафарида кардиохирургик амалиёт ўтказилиши режалаштирилган.
Скрининг кўриклар вақтида кечиктириб бўлмайдиган, шошилинч кардиохирургик амалиётга муҳтож беш нафар фуқаро танлаб олиниб, уларнинг уч нафари бир кунда операция қилинган.
Хусусан, текширув жараёнида Қўшрабод тумани «Қувкалла» маҳалласида яшовчи Муниса Аҳмедованинг қизида юрак нуқсони аниқланган. Аниқланган касаллик операция орқали бартараф этилиши сабабли шифокорларнинг тавсияси асосида Муниса Аҳмедованинг қизи операция қилинган.
«Ўтган йили катта қизимнинг юрагида ҳам нуқсон аниқланганди. Афсуски, уни вилоят марказига олиб боришга маблағимиз йўқ эди. Бугун вилоятдан шифокорлар келиб, ҳаммасини ўзлари қилишяпти», — дейди Муниса Аҳмедова.
Самарқанд вилоят кардиология маркази бош шифокори Мақсуд Саидовнинг маълум қилишича, эндиликда нафақат бугунги беш нафар бемор, балки кўрикда аниқланган, юрак операциясига муҳтож бўлган 57 нафар қўшработликнинг барчасида шу ернинг ўзида жарроҳлик амалиёти бажарилиб, соғломлаштирилади. Вилоят кардиология маркази шифокорлари ҳар шанба куни шу ҳудудда операция ўтказади. Шунингдек, қўшработлик шифокорларнинг вилоят марказида малака ошириши йўлга қўйилиб, келгусида ушбу операцияларни маҳаллий жарроҳлар амалга ошириши режалаштирилган.
Мавзуга доир:
Изоҳ (0)