Qashqadaryodagi bankomatlarda naqd pul yo‘qligi, “obnalchi”lar esa katta foiz evaziga ishlayotgani aytilmoqda (video)

Qashqadaryo viloyatining Qarshi shahridagi bankomatlarda naqd pul yo‘qligi, aholi sarson bo‘layotgani, bankomatlar oldida esa “obnalchi”lar katta foiz evaziga naqdlashtirish bilan shug‘ullanayotgani aytilmoqda.

“‘O‘zsanoatqurilishbank’da ham, ‘Qishloqqurilishbank’da ham, ‘Hamkorbank’da ham naqd pul yo‘q ekan, ammo ‘obnalchi’lar foiz evaziga pul qilib bermoqda. Buni qanday tushunish mumkin? Demak, bular bankka taalluqli odamlarmi”, — deydi Telegram’da video tarqatgan muallif.

Mazkur muammoga e’tibor qaratgan “O‘zsanoatqurilishbank” axborot xizmati rahbari Bekzod Bozorov bankka tegishli bankomatlarda muammo bartaraf etilganini ma’lum qildi.

“O‘zsanoatqurilishbank”ka tegishli bankomatlar naqdliklar bilan to‘liq ta’minlandi. Shu bilan birga, bankomatlardan foydalanish chog‘ida navbatlarning oldini olish maqsadida bank filiali xodimlari ham mijozlarga yaqindan yordam bermoqda”, — deyiladi bank axborot xizmati rahbarining shaxsiy Telegram-kanalida.

“Daryo” muxbiri bilan suhbatlashgan qashqadaryoliklar boshqa bank bankomatlarida hamon naqd pul yo‘qligini aytmoqda.