Андижон вилоятининг Избоскан туманида мактаб ўқитувчиси дарсга кеч қолган ўқувчига мажбуран сув ичиргани, нок баргини едириб, жазолагани ҳақида хабар берилганди. «Дарё» мухбири билан суҳбатлашганларнинг айтишича, Олий таълим муассасасининг 3-босқичида ўқувчи талаба ўқитувчи 6-синф ўқувчисига 2 литр ариқ сувини ичиргани рост.
Ўқувчини жазолаган ўқитувчининг айтишича, у дарсга кечиккан ўқувчидан қаердан келаётганини сўраган. Ўқувчи эса бунга жавобан ўқитувчига терс гапиргач, ўртада тортишув келиб чиққан.
«Андижон давлат университетининг география факультети 3-босқич талабасиман. Ушбу мактабга 2022 йилнинг 7 февраль кунидан бери география ўқитувчиси сифатида ишга келаман. Ўша куни навбатчи эдим. Ўқувчимиз иккинчи соатнинг ўрталарида мактабга кириб келди. Сабабини сўраганимда ортиқча гапириб, гап қайтарди. Шунингдек, ўқувчининг ‘шифохонадан келяпман, уйдагилар ўқитувчимга айтиб қўйишган’, деган гапи ҳам ёлғон бўлиб чиқди. Аслида у даладан келаётган экан. Шунга қарамасдан ўқувчи саволимга ‘Сизнинг ишингиз нима?’, дея гап қайтаришда давом этди. Кейин унга ўзингни босиб ол деб, ўзим истеъмол қилаётган сувдан ичирдим. Гап қайтармаслиги кераклиги ҳақида тушунтириш бериб дарсга киритиб юбордим. Орадан маълум бир вақт ўтиб, у қорни оғриётганини айтганидан кейин қишлоқ врачлик пунктига олиб бордим. Шифокорларнинг айтган гапларига қарамасдан у тиббий кўрикдан бош тортиб, уйига кетиб қолди. Бор вазият шундан иборат. Бўлган воқеаларда ўзимни оқлаш ниятида эмасман. Ёш ўқитувчи сифатида билмасдан хато қилиб қўйганим учун барча ҳамкасбларим ва ота-оналардан узр сўрайман», — дейди ўқитувчи.
Мактаб директорининг ўқув ишлари бўйича ўринбосари Фарида Усмонованинг айтишича, у йиғилишдан келганида дарс ўтаётган ўқитувчилардан бири ўқувчини ташқарига олиб чиққан.
«Бу ўқитувчимиз ўша куни навбатчиликда туриб, кеч қолувчи ўқувчиларнинг кирди-чиқдисини назорат қилиб турган. Ўқувчи шу куни иккинчи соатдан ҳам кеч қолган. Воқеадан хабар топганимдан сўнг ўқувчи болани чақирдим-да, ҳолатини аниқлаштирдим. Ўқитувчидан нима қилдинг деб сўрасам, озгина сув ичирганман деди. Тезда амбулаторияга олиб чиқишни буюрдим. У ерда шифокор кўриб қўяй деса, ўқувчимиз уйига кетиб қолибди. Уйда тез ёрдамга телефон қилишган. Тез ёрдам бориб, унга биринчи ёрдамни кўрсатган. Мен бундан ҳижолат бўлиб, психолог, ‘замдиректор’, касаба уюшма раиси, ҳаттоки ‘участковой’ ҳамда маҳалла йиғинидагиларни олиб, ўқувчининг уйига бордик. Уйда эътиборсиз қолмасин деб, шошилинч тез тиббий ёрдам филиалига олиб келдик. Бу ерда Исломбек деган йигит текширув ўтказиб, боладан ҳожатга борган ёки бормаганини сўради. Ўқувчи икки-уч маротаба бордим деганида ундан ўтиб кетибди, ҳижолат бўлманглар қўрқинчлик нарса эмас деди. Онасига Пойтуғга олиб боришни таклиф қилганимда ‘опа ҳижолат бўлманг, ҳаммаси яхши, ҳозир укол қилиб қўйди’, деганди. Шу билан уйига кетишди. Бошқа салбий ҳолатлар юз бергани йўқ», — дейди Фарида Усмонова.
Фарида Усмонованинг қўшимча қилишича, шахсан ўзи ўқувчини туман марказида УЗИ ва бошқа кўриклардан ўтказган. Амбулатория шифокорлар даволанишга муҳтож эмаслигини билдириб, уйга жавоб берган.
«Эртаси куни ўқитувчи ва психолог билан бирга ўқувчимиздан хабар олдик. Чунки у ўзимнинг жияним. Кейин ўқувчининг дадасига қўнғироқ қилдим. У Тошкентдалигини айтди. Ундан ҳижолат бўлмаслигини ўзим турганимни айтиб, эртасига туман марказига олиб бориб, шахсан ўзим УЗИ кўригидан ўтказиб, қон ва сийдик таҳлилларини қилдирдим. Ҳаммаси яхши экан. Марказда ҳам кўрсатиб бўлиб, ёнимиздаги поликлиникага олиб кириб, педиатр врачга кўрсатдим. Врач УЗИ қоғозлари яхшилигини, даволанишга муҳтож эмаслигини айтди. Бошқа ҳеч нарса бўлгани йўқ» — дейди Фарида Усмонова.
Лўғумбек қишлоқ врачлик пункти умумий амалиёт шифокори Зулхумор Суярованинг маълум қилишича, таҳлил натижалари тоза чиққани ва касаллик тасдиқланмагани учун ўқувчига муолажа ёзиб бермаган. Аксинча, қайта «анализ» топширишни тавсия қилган.
«Улар 2022 йилнинг 8 апрель куни қабулга келди. Шикоят ошқозон соҳасида оғриқ эканини айтишди. Нима бўлганини сўрасам, сув ичганман деди. Кейин у болага биринчи ёрдам кўрсатиш учун оғриқ қолдирувчи дори буюрдим. Шу билан чиқиб кетишди. Орқасидан суриштирсам у бола ўша куни уколни олмасдан тўғри уйига кетиб қолган экан. Ўша пайтда ўқитувчиси ёнида эди. Эртаси куни яна қабулга аммаси ва ўқитувчи билан келди. Пойтуғга бориб УЗИга тушган бўлган, анализ қоғозлари билан келди. УЗИ қоғозида пиелонефрит деб берган. Лекин таҳлиллари тоза чиққан. Шунинг учун ҳеч қандай шамоллаш белгиларини кўрмадим. Шунда қайта анализ топширишларини сўраганман. Касаллиги тасдиқланмагани учун унга муолажа ёзмаганман. Чунки, таҳлиллари УЗИга мос келиши керак эди, мос келмаган. Аммо боладан бирор жойинг оғрияптими десам шикоят қилмаган. Яхшиман деб ёнимда ўйнаб кулиб, чиқиб кетган», — дейди Зулхумор Суярова.
Ўқувчининг онаси «Дарё» мухбири билан суҳбатда ўқитувчи уларнинг қариндоши бўлишини, қариндошлар ўртасида ҳеч қандай адоват йўқлигини айтиб, у ўғлига арча ейишни буюрганини, аммо ўғли арча емаганини билдирган. Ўқувчининг синфдошлари ҳам ўқитувчининг синфдошига мажбурлаб сув ичирганини айтмоқда.
Избоскан тумани ҳокимлигининг ижтимоий тармоқдаги саҳифасида ҳолат юзасидан раддия эълон қилиниб, «ўқитувчи ўша куни мактабда навбатчи сифатида фаолият олиб борган. Шу сабабли тартиб-қоидага масъул сифатида иш кўрган. Дарсга кеч қолган ўқувчидан кеч қолганининг сабаби сўралганида ўқувчи уй юмушлари билан кеч қолганлигини айтмасдан сув ичишга чиқиб, кеч қолганлигини билдирган. Ўрганиш жараёнида бу ҳолатни унинг дўстлари ва синфдошлари ҳам тасдиқлаган», дейилади.
Шунингдек, ҳокимлик фан ўқитувчиси ўқувчи ўз жияни бўлганлиги сабабли унга танбеҳ берганини, болада ҳеч қандай касаллик кузатилмаганини, бола шифокор кўригидан ўтишдан бош тортиб, уйига қочиб кетганини ёзган.
Ҳокимлик ахборот хизмати раҳбари «Дарё» мухбири билан суҳбатда «Дарс ўқувчи учун тартиб-қоида асосида ўтилади. Бу ўқитувчи баъзи ўқитувчилардек ўқувчини саваламаган. Ўқувчининг ўз ёлғонига қарши иш қилган. Яъни чанқагандим деган, ўқитувчи сув ичирган. Бу билан мен ўқитувчининг ёнини олмайман. Педкенгашъда бу ўқитувчи масаласи кўрилган. Лекин, ўқувчи ҳам ёшликдан тартиб қоидага асосан иш кўрмаса, эртага ким бўлади? Ҳамма ўз ишини билиб қилса, бундай ҳолатлар бўлмайди-ку», — дейди ҳокимлик вакили.
«Дарё» воқеалар ривожини кузатишда давом этади.
Изоҳ (0)