Toshkent viloyatining Yangiyo‘l tumanida sodir bo‘lgan yo‘l-transport hodisasi oqibatida ikki kishi halok bo‘ldi, deb xabar beradi YHXX axborot xizmati.
Ma’lum qilinishicha, 18-aprel kuni soat 06:15 larda Toshkent viloyati Yangiyo‘l tumani hududidan o‘tuvchi M-39 avtomobil yo‘lining 829-kilometrida 42 yoshli haydovchi U.I. Lada-Largus rusumli avtomobilida harakatlanayotib, uxlab qolishi natijasida yo‘lning o‘ng chetida to‘xtab turgan haydovchi U.U. (1976-yilda tug‘ilgan) boshqaruvidagi Isuzu rusumli yuk avtomobilning orqa tomoniga to‘qnashgan.
Hodisa oqibatida Lada-Largus avtomobili yo‘lovchilari — 39 yoshli M.O. va 12 yoshli O.J. olgan og‘ir tan jarohatlari tufayli voqea joyida vafot etgan. Shuningdek, yana bir yo‘lovchi shifoxonaga yotqizilgan.
Mazkur YTH yuzasidan Yangiyo‘l tumani IIB huzuridagi Tergov bo‘limi tomonidan dastlabki tergov harakatlari olib borilmoqda.
Eslatib o‘tamiz, 14-aprel kuni Surxondaryo viloyati Angor tumani hududidan o‘tuvchi 4R-102 avtomobil yo‘lida Nexia-3 avtomashinasi haydovchisi harakatlanish chog‘ida boshqaruvni yo‘qotgan va qarama-qarshi tomondan kelayotgan yana bir Nexia-3 mashinasi bilan to‘qnashgandi. Oqibatda avtotransport vositalarining birida yong‘in yuzaga kelgan. Yo‘lovchilar — Q.R. (23 yoshli, erkak), A.Y. (23 yoshli, ayol) va haydovchi O. hayot uchun xavfli bo‘lgan og‘ir tan jarohati olib, voqea joyida halok bo‘lgan.
Izoh (0)