Respublika suv omborlarida yig‘ilgan suv zaxirasi yetarli emas — Suv xo‘jaligi vazirligi

Mart oyida kuzatilgan yog‘ingarchiliklar natijasida O‘zbekiston suv omborlarida jami 9,46 milliard kub suv yig‘ildi. Bu haqda suv xo‘jaligi vazirining birinchi o‘rinbosari Azimjon Nazarov 18-aprel kuni AOKAda o‘tkazilgan matbuot anjumanida ma’lum qildi, deb xabar berdi “Daryo” muxbiri.

Azimjon Nazarovning aytishicha, mart oyida kuzatilgan yog‘ingarchilik juda katta yordam bo‘lgan.

Bugungi kunda, raqamlarga to‘xtaladigan bo‘lsak, respublikamiz suv omborlarida jami 9,46 milliard kub suv yig‘ildi. Bu 2021-yil bilan solishtiradigan bo‘lsak 663 million kub metrga ko‘p. Lekin ko‘p yillikka solishtirganda hozirgi yig‘ilgan suv, o‘rtacha uch yillikka nisbatan oladigan bo‘lsak, 520 million kub kam. Bu yog‘ingarchilikdan suvni Surxondaryo viloyatidagi Janubiy Surxon, To‘palang suv omborlariga, Qashqadaryo viloyatidagi Chimqo‘rg‘on, Pachkamar, Qamashi suv omborlariga, Samarqand viloyatidagi Kattaqo‘rg‘on, Oqdaryo suv omborlariga, Jizzax viloyatidagi Jizzax suv omboriga va Toshkentdagi Ohangaron, Toshkent suv omborlariga yig‘ib oldik. Bu orqali o‘ziga yarasha zaxira yaratildi. Lekin bu zaxira yetarli emas.

“O‘zgidromet” prognozlari aytyaptiki, Amudaryo havzasida suv kam bo‘ladi, Surxondaryoda 65-70 foiz, Qashqadaryoda 55-65 foiz bo‘lishi bashorat qilinyapti. Aprel oyining ikkinchi yarmi, shuningdek, may oyining boshida yaxshigina yomg‘ir yog‘ishi kutilmoqda. Shu yomg‘ir miqdorining yaxshi bo‘lishi bizga qo‘shimcha sharoit yaratadi, suv omborlarimizga suv yig‘ib olish hamda yog‘gan yomg‘ir orqali qishloq xo‘jaligi ekinlarini qisman sug‘orishga yordam beradi, — deydi u.

“Har bir viloyat, har bir kanal qancha miqdorda suv olishi uchun limit qo‘yilgan. Unda qancha suv beriladi, qancha ishlatilishi kerakligi ko‘rsatilgan. Suv tanqis bo‘lganda Xorazm va Qoraqalpog‘istonga suvni yetarlicha bera olmaymiz. Lekin viloyatlardagi sug‘orish tizimining foydali ish koeffitsiyenti hisobiga qaysi viloyatlarda ko‘proq suv yo‘qotilishini aytishimiz mumkin. Xorazm viloyati, Qoraqalpog‘iston Respublikasida juda ko‘p sug‘orish tizimlari tuproq o‘zanli. Shuning uchun ham biz investitsiya dasturlari doirasida o‘sha viloyatlarga ko‘proq mablag‘ ajratyapmiz, shu bilan birga, xorijiy investitsiyalar hisobidan ham loyihalar yo‘naltirilgan”, — deydi suv xo‘jaligi vazirining birinchi o‘rinbosari.