“Bir xodimning haqoratlanishi, uning butun oilasiga salbiy ta’sir qiladi” — Jahongir Ortiqxo‘jayev fuqarolardan “GAI” xodimlarini haqorat va kalaka qilmaslikni so‘radi

Toshkent shahar hokimi Jahongir Ortiqxo‘jayev 16-aprel kuni Yo‘l harakati xavfsizligi xizmati (YHXX) xodimlari bilan uchrashuv o‘tkazgan. Bu haqda hokimlik axborot xizmati Telegram’dagi kanaliga videolavha joyladi.

Lavhada Jahongir Ortiqxo‘jayev YHXX xodimlarining aholi bilan, fuqarolarni esa xodimlar bilan qo‘pol muomalada bo‘lmaslikka chaqirgani aks etgan.

“DAN (YHXX —“Daryo” izohi.) xodimiga qo‘pol gapirish noto‘g‘ri. Ular ham kimningdir akasi, ukasi yoki otasi. Fuqarolardan ular bilan muomala qilayotganda og‘irroq bo‘lishlarini, beodoblik qilmasliklarini iltimos qilaman. Kimlardir “GAI” xodimini videoga olib, kalaka qilib, ustidan kulmoqchi bo‘ladi. Faraz qiling, u uyiga borsa, 16 yasharli voyaga yetgan qizi yoki o‘g‘li otasining butun internetda tarqagan videosini ko‘radi. Yoki xodimning onasi o‘sha videoni ko‘rgan bo‘lishi mumkin. Bularga og‘ir. Xodimining haqoratlanishi va kamsitilishi, uning butun oilasiga qattiq salbiy ta’sir qiladi. Fuqarolar arzimagan “shtraf”ni to‘lamaslik yoki qo‘pol gapirib qo‘ygani uchun xodimni sharmanda qilishi bizning xalqqa yarashmaydi. Ularga ham fuqarolar o‘zining akasi, ukasi yoki otasidek yaqin inson sifatida muomala qilsalar yaxshi bo‘lardi. Toshkentda, umuman, respublikada DAN xodimlarining ishi eng og‘ir ishlardan bittasi. Birortamiz 10 soat bir joyda tik oyoqda turib ishlay olmaymiz. Bir kunda oldingizdan 30-40 mingta mashina o‘tayotganda ishlash oson emas”, — degan hokim.

Avvalroq  Jahongir Ortiqxo‘jayev mas’ullarga 10 kun muddatda Toshkentdagi asosiy yo‘llarni ta’mirlash topshirig‘ini bergani xabar qilingandi.