Sirdaryo viloyat hududidagi “Sirdaryo” YPX maskanida 11-aprel kuni hech qanday hujjatlarsiz olib ketilayotgan go‘sht mahsulotlari aniqlandi. Bu haqda viloyat Ichki ishlar boshqarmasi xabar qildi.
Qayd etilishicha, Sirdaryo
viloyati IIB hamda viloyat Veterinariya va chorvachilikni rivojlantirish boshqarmasi xodimlari tadbir o‘tkazgan. Tadbir davomida Qashqadaryo—Toshkent yo‘nalishida harakatlanib o‘tayotgan Nexia-1 avtotransport vositasi xolislar ishtirokida to‘xtatilib tekshirilgan. Natijada Qashqadaryo viloyati Chiroqchi tumani Torjilg‘a qishlog‘ida yashovchi fuqaro E.Sh (1986-yilda tug‘ilgan) boshqaruvidagi avtotransport yuk xonasida hech qanday hujjatlarsiz, kelib chiqishi noma’lum bo‘lgan 446 kilogramm hayvon go‘shti borligi aniqlangan.
Ushbu go‘sht mahsulotlari viloyat Hayvonlar kasalliklari tashxisi va oziq-ovqat mahsulotlari xavfsizligi davlat markaziga olib kelingan. Laboratoriya tekshiruvlaridan o‘tkazilganda, iste’molga yaroqsiz ekani ma’lum bo‘lgan. Iste’molga yaroqsizligi to‘g‘risida laboratoriya xulosalari olingan.
Mahsulotlar viloyat Veterinariya va chorvachilikni rivojlantirish boshqarmasining tegishli xulosasiga asosan ko‘mish yo‘li bilan yo‘q qilingan. Fuqaro E.Sh boshqaruvidagi avtotransport vositasi tegishli tartibda qonuniy chora ko‘rish uchun jarima maydoniga qo‘yilgan.
Hozirda aniqlangan holat yuzasidan mas’ul xodimlar tomonidan surishtiruv ishlari olib borilmoqda.
Mavzuga doir:
Izoh (0)