«Бир ходимнинг ҳақоратланиши, унинг бутун оиласига салбий таъсир қилади» — Жаҳонгир Ортиқхўжаев фуқаролардан «ГАИ» ходимларини ҳақорат ва калака қилмасликни сўради

Тошкент шаҳар ҳокими Жаҳонгир Ортиқхўжаев 16 апрель куни Йўл ҳаракати хавфсизлиги хизмати (ЙҲХХ) ходимлари билан учрашув ўтказган. Бу ҳақда ҳокимлик ахборот хизмати Telegram’даги каналига видеолавҳа жойлади.

Лавҳада Жаҳонгир Ортиқхўжаев ЙҲХХ ходимларининг аҳоли билан, фуқароларни эса ходимлар билан қўпол муомалада бўлмасликка чақиргани акс этган.

«ДАН (ЙҲХХ —«Дарё» изоҳи.) ходимига қўпол гапириш нотўғри. Улар ҳам кимнингдир акаси, укаси ёки отаси. Фуқаролардан улар билан муомала қилаётганда оғирроқ бўлишларини, беодоблик қилмасликларини илтимос қиламан. Кимлардир «ГАИ» ходимини видеога олиб, калака қилиб, устидан кулмоқчи бўлади. Фараз қилинг, у уйига борса, 16 яшарли вояга етган қизи ёки ўғли отасининг бутун интернетда тарқаган видеосини кўради. Ёки ходимнинг онаси ўша видеони кўрган бўлиши мумкин. Буларга оғир. Ходимининг ҳақоратланиши ва камситилиши, унинг бутун оиласига қаттиқ салбий таъсир қилади. Фуқаролар арзимаган «штраф»ни тўламаслик ёки қўпол гапириб қўйгани учун ходимни шарманда қилиши бизнинг халққа ярашмайди. Уларга ҳам фуқаролар ўзининг акаси, укаси ёки отасидек яқин инсон сифатида муомала қилсалар яхши бўларди. Тошкентда, умуман, республикада ДАН ходимларининг иши энг оғир ишлардан биттаси. Бирортамиз 10 соат бир жойда тик оёқда туриб ишлай олмаймиз. Бир кунда олдингиздан 30-40 мингта машина ўтаётганда ишлаш осон эмас», — деган ҳоким.

Аввалроқ  Жаҳонгир Ортиқхўжаев масъулларга 10 кун муддатда Тошкентдаги асосий йўлларни таъмирлаш топшириғини бергани хабар қилинганди.