Samarqand viloyatining Toyloq tumanida joylashgan maktablarning birida 50 tup terak o‘zboshimchalik bilan kesib tashlangani aniqlandi. Bu haqda viloyat Ekologiya va atrof-muhitni muhofaza qilish boshqarmasi xabar berdi.
Ma’lum qilinishicha, Toyloq tumani Xalq ta’limi bo‘limiga qarashli 15-umumta’lim maktabi hududidagi 50 tup terak ta’lim dargohining ehtiyojlariga sarflash maqsadida maktab ma’muriyati tomonidan kesilgan.
Mazkur daraxtlarni kesish uchun maktab direktori F.Komilov 2022-yilning 26-yanvar kuni maktab hududidagi daraxtlarni maqsadli kesish va o‘rniga yangisini ekish lozimligi to‘g‘risida davlat xizmatlari orqali murojaat qilgan. Ammo murojaatga binoan Ekogoliya boshqarmasi tomonidan 15-fevraldagi javob xatiga asosan, rad etilgani to‘g‘risida xulosa xati berilgan.
“Holat bo‘yicha qo‘shimcha ravishda o‘rganishlar olib borilib, qat’iy choralar ko‘rilishini ma’lum qilamiz”, — deyiladi munosabatda.
Avvalroq Surxondaryoda bog‘cha hududidagi 43 tup daraxt noqonuniy kesilgani, Toshkentning “Turkiston” saroyi oldidagi chinor va teraklar kesib tashlangani, Andijonda 25 yillik daraxtlar o‘rnida ixtisoslashtirilgan maktab qurilishi, Sirdaryoda 170 tup tol daraxti kesib tashlangani to‘g‘risida xabar berilgandi.
Izoh (0)