АҚШдан бир гуруҳ демократ қонунчилар, жумладан, тўрт нафар сенатор ва Вакиллар палатаси аъзолари Украинани қўллаб-қувватлаш учун Польша, Ҳиндистон, Германия, Непал ва Бирлашган Араб Амирликларига боради. Бу ҳақда The Hill нашри хабар берди.
«Конгресснинг мазкур кучли делегациясида АҚШ Украина ва НАТОдаги иттифоқчиларини қўллаб-қувватланишни қандай давом эттириш мақсадида Польшадаги АҚШ ҳарбий раҳбарияти ҳамда қўшинлари билан учрашиш имкони бўлади», — дейилади хабарда.
Конгрессменларнинг таъкидлашича, делегация «глобал кескинлик кучайган ҳозирги даврда» алоқаларни яхшилаш учун Польша, БАА, Ҳиндистон, Непал ва Германияда бир қатор муҳим хорижий етакчилар билан учрашади.
Сафарга отланадиганлар қаторида сенаторлар Марк Келли (Аризона штати), Кирстен Гиллибранд (Нью-Йорк штати), Кори Букер (Нью-Жерси штати), Эд Марки (Массачусетс штати), шунингдек, Вакиллар палатаси аъзоси Мондер Жонс (Нью-Йорк штати) бор.
Ўтган ҳафта сенатор Стив Дейнс ва Вакиллар палатаси аъзоси Виктория Спарц Киевга ташриф буюрганди. Уларнинг ташрифи Россия томонидан ҳарбий операциялар бошланганидан бери Америка қонунчиларининг биринчи ташрифи ҳисобланади. Шунингдек, АҚШ президент Жо Байден ўзи ҳам Киевга боришга тайёрлигини маълум қилган.
Февраль охиридан буён Украинага айрим хориж сиёсатчилари ташриф буюрди, хусусан, Евроиттифоқнинг ташқи ишлар масалалари бўйича олий вакили Жозеп Боррел, Еврокомиссия раҳбари Урсула фон дер Ляйен. Улар Киевга 8 апрель куни келганди. Шунингдек, Буюк Британия бош вазири Борис Жонсон, Австрия канцлери Карл Нехаммер ҳам Киевга ташриф буюрган.
Изоҳ (0)