Toshkent metropoliteni jetonlar bekor qilinganidan yarim yil o‘tib, aholidan ularni sotib olishini e’lon qilgani to‘g‘risida xabar berilgandi. Iste’molchilar huquqlarini himoya qilish agentligining ma’lum qilishicha, bu agentlik tomonidan “Toshkent metropoliteni” DUKka jetonlarni sotib olish bo‘yicha tegishli buyruq yo‘llaganidan so‘ng amalga oshirilgan.
Ma’lum qilinishicha, 2022-yilning yanvar oyida Iste’molchilar huquqlarini himoya qilish agentligiga Toshkent shahrida istiqomat qiluvchi V.K. ismli fuqaro amal qilish muddatida 20 donadan ortiq xarid qilgan jetoni qolib ketgani va undan foydalanishga ulgurmagani bo‘yicha murojaat qilgan.
Agentlik tomonidan “Toshkent metropoliteni” DUKka sotib olingan metro jetonlari evaziga pulni qaytarish bo‘yicha so‘rovlar yuborilganiga qaramay, oradan bir necha oy o‘tsa ham, masala hal etilmagan. Shundan so‘ng agentlik “Toshkent metropoliteni” DUK bilan iste’molchilarning nomuayyan doirasini (jetonga ega bo‘lgan fuqarolarni) himoya qilish maqsadida ish olib borgan.
Xususan, 2022-yilning 16-martida agentlik o‘z vakolati doirasida pul mablag‘larini iste’molchiga qaytarish yoki o‘rniga QR kodli chiptalar ko‘rinishida metropolitenda harakatlanish uchun amaldagi to‘lov shakllarini yoki yagona transport kartalarini 15-apreldan boshlab taqdim etish to‘g‘risida bajarilishi majburiy bo‘lgan buyruqni chiqargan.
“Iste’molchilar huquqlarini himoya qilish to‘g‘risida”gi qonunning 10-moddasiga asosan tovar (ish, xizmat)lar uchun haq to‘lash shakli hamda tartibi iste’molchi bilan sotuvchi (ishlab chiqaruvchi, ijrochi) o‘rtasidagi kelishuvga binoan belgilanadi. Metropolitenda dastlab jetonlar sotilgan, iste’molchi ularni sotib olib, bitim tuzgan, ya’ni kelishilgan — ommaviy ofertani qabul qilgan. Biroq ushbu bitim bugungi kunga qadar bir tomonlama tartibda qolgan, yetkazilgan zarar esa qoplanmagan.
Amaldagi qonunchilikka muvofiq 2022-yil 15-mart kuni agentlik tomonidan iste’molchilar huquqlarining buzilishi bo‘yicha barcha kamchiliklarni imkon qadar tezroq bartaraf etish va sotib olingan jetonlar uchun pul qaytarilishi, metropolitenda yo‘l haqini amaldagi shakllarini, ya’ni jeton o‘rniga QR kodli chiptalar taqdim etish bo‘yicha chora-tadbirlar ko‘rish uchun majburiy buyrug‘i qabul qilingan.
Eslatib o‘tamiz, 2020-yilning noyabridan boshlab Toshkent metropolitenida yo‘lovchilar uchun jetonlarni sotish to‘xtatilib, avtomatlashtirilgan to‘lov tizimi joriy etilgan edi. 2021-yilning 1-dekabridan boshlab Toshkent metropolitenida yo‘l haqini to‘lash uchun jetonlarni qabul qilish to‘xtatilgan. Barcha bekatlar QR kodli bilet, transport va bank kartalari hamda NFC orqali to‘lovlarni amalga oshirish imkonini beruvchi statsionar validatorlar bilan jihozlangan.
Izoh (0)