Тошкент метрополитени жетонлар бекор қилинганидан ярим йил ўтиб, аҳолидан уларни сотиб олишини эълон қилгани тўғрисида хабар берилганди. Истеъмолчилар ҳуқуқларини ҳимоя қилиш агентлигининг маълум қилишича, бу агентлик томонидан «Тошкент метрополитени» ДУКка жетонларни сотиб олиш бўйича тегишли буйруқ йўллаганидан сўнг амалга оширилган.
Маълум қилинишича, 2022 йилнинг январь ойида Истеъмолчилар ҳуқуқларини ҳимоя қилиш агентлигига Тошкент шаҳрида истиқомат қилувчи V.К. исмли фуқаро амал қилиш муддатида 20 донадан ортиқ харид қилган жетони қолиб кетгани ва ундан фойдаланишга улгурмагани бўйича мурожаат қилган.
Агентлик томонидан «Тошкент метрополитени» ДУКка сотиб олинган метро жетонлари эвазига пулни қайтариш бўйича сўровлар юборилганига қарамай, орадан бир неча ой ўтса ҳам, масала ҳал этилмаган. Шундан сўнг агентлик «Тошкент метрополитени» ДУК билан истеъмолчиларнинг номуайян доирасини (жетонга эга бўлган фуқароларни) ҳимоя қилиш мақсадида иш олиб борган.
Хусусан, 2022 йилнинг 16 мартида агентлик ўз ваколати доирасида пул маблағларини истеъмолчига қайтариш ёки ўрнига QR кодли чипталар кўринишида метрополитенда ҳаракатланиш учун амалдаги тўлов шаклларини ёки ягона транспорт карталарини 15 апрелдан бошлаб тақдим этиш тўғрисида бажарилиши мажбурий бўлган буйруқни чиқарган.
«Истеъмолчилар ҳуқуқларини ҳимоя қилиш тўғрисида»ги қонуннинг 10-моддасига асосан товар (иш, хизмат)лар учун ҳақ тўлаш шакли ҳамда тартиби истеъмолчи билан сотувчи (ишлаб чиқарувчи, ижрочи) ўртасидаги келишувга биноан белгиланади. Метрополитенда дастлаб жетонлар сотилган, истеъмолчи уларни сотиб олиб, битим тузган, яъни келишилган — оммавий офертани қабул қилган. Бироқ ушбу битим бугунги кунга қадар бир томонлама тартибда қолган, етказилган зарар эса қопланмаган.
Амалдаги қонунчиликка мувофиқ 2022 йил 15 март куни агентлик томонидан истеъмолчилар ҳуқуқларининг бузилиши бўйича барча камчиликларни имкон қадар тезроқ бартараф этиш ва сотиб олинган жетонлар учун пул қайтарилиши, метрополитенда йўл ҳақини амалдаги шаклларини, яъни жетон ўрнига QR кодли чипталар тақдим этиш бўйича чора-тадбирлар кўриш учун мажбурий буйруғи қабул қилинган.
Эслатиб ўтамиз, 2020 йилнинг ноябридан бошлаб Тошкент метрополитенида йўловчилар учун жетонларни сотиш тўхтатилиб, автоматлаштирилган тўлов тизими жорий этилган эди. 2021 йилнинг 1 декабридан бошлаб Тошкент метрополитенида йўл ҳақини тўлаш учун жетонларни қабул қилиш тўхтатилган. Барча бекатлар QR кодли билет, транспорт ва банк карталари ҳамда NFC орқали тўловларни амалга ошириш имконини берувчи стационар валидаторлар билан жиҳозланган.
Изоҳ (0)