Shavkat Mirziyoyev 15-aprel kuni oziq-ovqat mahsulotlari ishlab chiqarishni ko‘paytirish orqali bozorlarda narx-navo barqarorligini ta’minlash hamda biznesni qo‘llab-quvvatlash bo‘yicha qo‘shimcha sharoitlar yaratish bo‘yicha o‘tkazilgan yig‘ilishda dehqon va fermerlarini eng ko‘p qiynaydigan masalalarni sanab o‘tdi.
Davlat rahbarining so‘zlariga ko‘ra, bu hosildor va ishonchli urug‘ va ko‘chat navlarining kamligi va peshona teri evaziga yetishtirilgan mahsulot kafolatli xarid qilinmasligidir.
Shu sababli, hosildor urug‘ va ko‘chat navlarini joylarga yetkazish va mahsulotni sotib olishga Qishloq xo‘jaligi jamg‘armasidan Bog‘dorchilik agentligiga qo‘shimcha 300 milliard so‘m ajratiladi. Shuningdek, yangi suv omborlari atrofidagi 100 ming gektardan ortiq yerlarga tadbirkorlarni jalb etib, infratuzilma yaratishga yordam berib, mos keladigan ekinlar ekishni tashkil qilish kerakligi ko‘rsatib o‘tildi.
Viloyat hokimlariga bir oy muddatda:
- o‘z hududidagi suv omborlari atrofidagi yangi yerlarning xaritasini tuzish;
- yerlarni konturlarga ajratib, ularga irrigatsiya tarmog‘ini loyihalash;
- ushbu maydonlarda oziq-ovqat va ozuqa ekinlarini ekishga tayyor investorlarni jalb qilish bo‘yicha loyiha to‘plamlarini tayyorlash topshirildi.
Prezident, shuningdek, jahon bozorida mineral o‘g‘itlar va yoqilg‘i narxlari 2 baravarga oshgani albatta klaster, fermer va dehqonlarning yetishtirayotgan mahsulotlarining tannarxiga hamda moliyaviy ahvoliga ta’sir qilishini qayd etib o‘tgan.
Izoh (0)