Qo‘qonda Lacetti ag‘darildi, Jizzaxda Lacetti yuk mashinasi bilan to‘qnashdi. YTHlar tafsilotlari

O‘zbekiston yo‘llarida sodir bo‘lgan yo‘l-transport hodisalari tafsilotini taqdim etamiz.

Qo‘qonda Lacetti ag‘darildi

2022-yil 12-aprel kuni soat 06:35 lar chamasida Dang‘ara tumani “Katta Ganjiravon” MFY, Marvarid ko‘chasi 117-uyda yashovchi fuqaro (2005-yil kuni tug‘ilgan) A.M. o‘g‘li, dadasi J.B.ga tegishli bo‘lgan Lacetti’ni boshqarishga huquqi bo‘lmay turib boshqargan.

U Qo‘qon shahar A.Charxiy ko‘chasida harakatlanib A.T.Xuqandiy mavzesi 60-sonli ko‘p qavatli uy ro‘parasida boshqaruvni yo‘qotib yo‘lni ajratib turuvchi beton to‘siqda joylashgan stolbaga urilgan.

Oqibatda peshona sohasi, chap qo‘l tirsak sohasi shilinma jarohatlari bilan Qo‘qon shahar shoshilinch tez tibbiy yordam ko‘rsatish markaziga murojaat qilgan.

Hozirda Qo‘qon shahar IIB YHXB tomonidan ushbu holat yuzasidan tergovga qadar surishtiruv ishlari olib borilmoqda.

Jizzaxda Lacetti yuk mashinasi bilan to‘qnashdi

2022-yil 12-aprel kuni soat 21:30 larda, Jizzax viloyati Paxtakor tumani hududidan o‘tgan M-39 avtomobil yo‘lining 962-kilometrida Toshkent–Samarqand yo‘nalishida harakatlanayotgan haydovchi I.B. boshqaruvidagi Lacetti hamda haydovchi A.U. boshqaruvida bo‘lgan HOWO yuk avtomobili ishtirokida YTH sodir bo‘lgan.

YTH oqibatida Lacetti avtomobil haydovchisi I.B. og‘ir tan jarohatlari olib voqea joyida vafot etgan. Ushbu avtomobilda bo‘lgan ikki nafar yo‘lovchilar tan jarohati bilan shifoxonaga yotqizilgan.

Mazkur YTH yuzasidan Paxtakor tumani IIB TB tomonidan dastlabki tergovoldi surishtiruv harakatlari olib borilmoqda.

Samarqandda Matiz’ga urilgan yuk avtomobili ag‘darildi

Dastlabki ma’lumotlarga ko‘ra, 2022-yil 14-aprel kuni soat 07:40 larda, Samarqand viloyati Jomboy tumani hududidan o‘tgan M-39 avtomobil yo‘lining 1070-kilometrida haydovchi S.N. tartibga solinmagan piyodalar o‘tish joyidan o‘tayotgan piyodaga yo‘l berib to‘xtagan.

Shu vaqtda bir yo‘nalishda ortidan harakatlanib kelgan haydovchi R.Y. o‘z boshqaruvidagi yuk avtomobilini to‘xtatishga ulgurmasdan Matiz avtomobilining orqa tomoniga to‘qnashib boshqaruvni yo‘qotgan va yuk avtomobili ag‘darilgan. Matiz avtomobili o‘ng tomon pastlikka tushib ketgan.

YTH oqibatida tan jarohati olgan fuqarolar yo‘q.

Ushbu YTH yuzasidan Jomboy tumani IIB YHXB xodimlari tomonidan surishtiruv olib borilmoqda.