Қўқонда Lacetti ағдарилди, Жиззахда Lacetti юк машинаси билан тўқнашди. ЙТҲлар тафсилотлари

Ўзбекистон йўлларида содир бўлган йўл-транспорт ҳодисалари тафсилотини тақдим этамиз.

Қўқонда Lacetti ағдарилди

2022 йил 12 апрель куни соат 06:35 лар чамасида Данғара тумани «Катта Ганжиравон» МФЙ, Марварид кўчаси 117-уйда яшовчи фуқаро (2005 йил куни туғилган) А.М. ўғли, дадаси Ж.Б.га тегишли бўлган Lacetti’ни бошқаришга ҳуқуқи бўлмай туриб бошқарган.

У Қўқон шаҳар А.Чархий кўчасида ҳаракатланиб А.Т.Хуқандий мавзеси 60-сонли кўп қаватли уй рўпарасида бошқарувни йўқотиб йўлни ажратиб турувчи бетон тўсиқда жойлашган столбага урилган.

Оқибатда пешона соҳаси, чап қўл тирсак соҳаси шилинма жароҳатлари билан Қўқон шаҳар шошилинч тез тиббий ёрдам кўрсатиш марказига мурожаат қилган.

Ҳозирда Қўқон шаҳар ИИБ ЙҲХБ томонидан ушбу ҳолат юзасидан терговга қадар суриштирув ишлари олиб борилмоқда.

Жиззахда Lacetti юк машинаси билан тўқнашди

2022 йил 12 апрель куни соат 21:30 ларда, Жиззах вилояти Пахтакор тумани ҳудудидан ўтган М-39 автомобиль йўлининг 962-километрида Тошкент–Самарқанд йўналишида ҳаракатланаётган ҳайдовчи I.Б. бошқарувидаги Lacetti ҳамда ҳайдовчи А.У. бошқарувида бўлган HOWO юк автомобили иштирокида ЙТҲ содир бўлган.

ЙТҲ оқибатида Lacetti автомобиль ҳайдовчиси I.Б. оғир тан жароҳатлари олиб воқеа жойида вафот этган. Ушбу автомобилда бўлган икки нафар йўловчилар тан жароҳати билан шифохонага ётқизилган.

Мазкур ЙТҲ юзасидан Пахтакор тумани ИИБ ТБ томонидан дастлабки терговолди суриштирув ҳаракатлари олиб борилмоқда.

Самарқандда Matiz’га урилган юк автомобили ағдарилди

Дастлабки маълумотларга кўра, 2022 йил 14 апрель куни соат 07:40 ларда, Самарқанд вилояти Жомбой тумани ҳудудидан ўтган М-39 автомобиль йўлининг 1070-километрида ҳайдовчи С.Н. тартибга солинмаган пиёдалар ўтиш жойидан ўтаётган пиёдага йўл бериб тўхтаган.

Шу вақтда бир йўналишда ортидан ҳаракатланиб келган ҳайдовчи Р.Й. ўз бошқарувидаги юк автомобилини тўхтатишга улгурмасдан Matiz автомобилининг орқа томонига тўқнашиб бошқарувни йўқотган ва юк автомобили ағдарилган. Matiz автомобили ўнг томон пастликка тушиб кетган.

ЙТҲ оқибатида тан жароҳати олган фуқаролар йўқ.

Ушбу ЙТҲ юзасидан Жомбой тумани ИИБ ЙҲХБ ходимлари томонидан суриштирув олиб борилмоқда.