Сўнгги уч йилда давлат-хусусий шерикликни ривожлантириш агентлиги томонидан 2,68 млрд доллардан ортиқ бўлган 289 та лойиҳа бўйича ишлар олиб борилган

Молия вазирлиги ҳузуридаги Давлат-хусусий шерикликни ривожлантириш агентлиги томонидан 2019—2021 йиллар давомида умумий қиймати 2,68 миллиард доллардан ортиқ бўлган жами 289 та давлат-хусусий шериклик лойиҳалари бўйича ишлар олиб борилган. Бу ҳақда АОКАда ўтказилган брифингда Давлат-хусусий шерикликни ривожлантириш агентлиги директори Зокир Бозоров маълум қилди.

Амалга оширилган лойиҳалар турли соҳалар кесимида олиб қаралганда, жумладан:

• энергетика соҳасида 1 та;
• коммунал хизматлар соҳасида 3 та;
• соғлиқни сақлаш соҳасида 32 та;
• сув хўжалиги соҳасида 105 та;
• экология соҳасида 62 та;
• таълим соҳасида 49 та;
• ҳунармандчилик саноати соҳасида 13 та;
• маданият соҳасида 20 та;
• транспорт, ветеринария ва чорвачиликни ривожлантириш, ахборот технологиялари ва ҳуқуқни муҳофаза қилиш соҳаларида 1 тадан лойиҳаларни ташкил этади.

Шундан давлат-хусусий шериклик тўғрисидаги битим имзоланган лойиҳалар сони 230 та, битим имзоланиш арафасида бўлган лойиҳалар сони 17 та, тендер босқичида бўлган лойиҳалар сони 46 тани ташкил этади.

Амалга оширилган лойиҳалардан бири Европа тикланиш ва тараққиёт банки ҳамкорлигида Қорақалпоғистон Республикасининг Қораўзак туманида 100 МВт шамол электр станцияси. Мазкур лойиҳа бўйича 2021 йил 17 декабрь куни лойиҳа бўйича тендер ғолиби деб топилган Саудия Арабистонининг ACWA Power компанияси билан Электр энергияни сотиб олиш тўғрисидаги ҳамда Давлат томонидан қўллаб-қувватлаш тўғрисидаги битимлар имзоланган.

Ушбу лойиҳа тендер асосида амалга оширилган бўлиб, ACWA Power компанияси билан бирга тендерда иштирок этиш учун Бирлашган Араб Амирликларининг Masdar компанияси (таклифи — 2,6 сент) ҳамда Франциянинг Voltalia компанияси (таклифи — 3,2 цент) ўз таклифларини берган.

Лойиҳанинг қиймати — 108 миллион долларни ва муддати 25 йилни, 1 кВт электр тарифи — 2,56 сентни ташкил этади. Мазкур лойиҳа доирасида:

• 110 мингдан ортиқ хонадонлар узликсиз электр энергия билан таъминланади;
• йилига 400 миллион квт/с электр энергия ишлаб чиқарилади;
• 25 дан ортиқ илғор шамол турбиналари ўрнатилади;
• қурилиш даврида 1000 га яқин янги иш ўринлар ва эксплуатация даврида 50 та доимий иш ўринлари яратилади;
• табиий газни норационал ишлатиш (ёқиш) даражаси пасайтирилади ва экологик жиҳатдан тоза энергия ишлаб чиқаришга эришилади;
• атмосферага зарарли бўлган карбонат ангидрид газларининг чиқиши кескин камаяди (йилига 160 минг тоннагача).

Яна бир лойиҳа – Халқаро молия корпорациясининг маслаҳат кўмагида Тошкент шаҳри, Қорақалпоғистон Республикаси ва Хоразм вилоятларида Гемодиализ хизмати марказлари. Мазкур лойиҳа бўйича 2021 йил 20 январь куни тендер ғолиби бўлган NephroPlus (Ҳиндистон) компанияси билан ДХШ тўғрисидаги битим имзоланди (лойиҳа қиймати – 9,8 миллион доллар; лойиҳа муддати – 10 йил).

Тендерда Frezenus (Германия), Diaverum (Швеция) ва NephroPlus (Ҳиндистон) компаниялари иштирок этган. Якунда NephroPlus (Ҳиндистон) – 503 401 сўм (48,4 доллар) компанияси тендер ғолиби деб топилган. Эндиликда кутиладиган натижалар:

• республикада 1100 та беморга бир марталик диализатор қўллаган ҳолда гемодиализ хизмати кўрсатилади;
• халқаро стандартлар бўйича гемодиализ марказлари шаклланади;
• ҳар бир беморларга йилига 144 сеансдан кам бўлмаган диализ ўтказилади;
• диализ сифатини ошиши ва беморлар умр кўриш давомийлиги 15-20 йилга оширади;
• малакали кадрлар базаси шаклланади;
• гемодиализ марказлари давлатга қайтарилади.

Шунингдек, яна бир лойиҳа — Самарқанд халқаро аэропортини модернизация қилиш ва бошқарувга бериш. Мазкур лойиҳа бўйича 2021 йил 23 сентябрь куни Air Marakanda компанияси билан ДХШ тўғрисидаги битим имзоланган (лойиҳа қиймати — 82,8 миллион доллар; лойиҳа муддати — 20 йил).