Toshkent shahar hokimi Jahongir Ortiqxo‘jayev mas’ullarga 10 kun muddatda shahardagi barcha asosiy yo‘llardagi ta’mirlash bo‘yicha topshiriq berdi. Bu haqda shahar hokimligi xabar qildi.
Qayd etilishicha, tinimsiz yomg‘ir yog‘ishi oqibatida Toshkentdagi asfalt yo‘llar ta’mirtalab ahvolga kelgan. Hokim 10 kun muddatda tuman hokimlariga butun shahardagi xususiy va davlat texnikalarini jalb qilishni buyurgan.
“Tushunaman, ish og‘ir, shahrimiz katta, kichik emas. Lekin mas’uliyatni olishingiz kerak, zarur bo‘lsa, kechqurun ishlaysizlar. YPX xodimlari ham ta’mirlash ishlari olib boriladigan hududlarni qattiq nazoratga olib, harakatni qulaylashtirib berishga mas’ul bo‘ladi. Agar 10 kundan o‘tib ketsa. kechirilmaydi. Prokuror hamma ishni nazorat qilib, mablag‘larning to‘g‘ri sarflanishi va yo‘llar sifatini tekshiradi. Birorta chuqurlik qolmasligi kerak. Sifatsiz yo‘lni qabul qilmaymiz”, — degan Ortiqxo‘jayev.
Shuningdek, shahar hokimi mas’ullarga ishchilar ertalablari dam olib, kechasi mashina yo‘q payti ishlashi kerakligini aytgan.
“Ta’mirlanayotgan ko‘chalarda tirbandlik yuzaga kelmasligi uchun har kuni yo‘llar tozalanadi. Harakat yuqori vaqtida ko‘chaning yarmini to‘sib, odamlarni sarson qilib, asabini buzib yurmanglar. Fuqarolarimizdan shikoyat tushsa, kerakli chora ko‘riladi. Xato qilishga haqqinglar yo‘q”, — deydi Toshkent shahar hokimi.
Izoh (0)