“Osiyo taraqqiyot banki ishtirokida avtomobil yo‘llarini rekonstruksiya qilish loyihalarini amalga oshirish chora-tadbirlari to‘g‘risida”gi prezident qarori qabul qilindi, deb xabar beradi Norma.
Qarorga ko‘ra, Osiyo taraqqiyot banki direktorlar kengashi tomonidan “Milliy avtomobil yo‘llarini rivojlantirish” loyihasini amalga oshirish uchun 273,8 million dollar miqdorida qarz mablag‘lari 4 yillik imtiyozli davr bilan 24 yil muddatga ajratish ma’qullangan. Shundan:
- 183,8 million dollar — 4R105 Darband—Boysun—Elbayon avtomobil yo‘lining 5—70-kilometrlari va 4R100 Manguzar—Jarqo‘rg‘on—Bandixon—Oltinsoy—Denov avtomobil yo‘lining 128—174 kilometr qisimlarini rekonstruksiya qilish loyihasini amalga oshirishga;
- 90 million dollar — A380 G‘uzor—Buxoro—Nukus—Beyneu avtomobil yo‘lining 228—315-kilometrlari (87 kilometr) qismini rekonstruksiya qilish loyihasini yakunlashga.
“Milliy avtomobil yo‘llarini rivojlantirish” loyihasining amalga oshirilishini muvofiqlashtirish va monitoring qilish, OTBning qarz mablag‘laridan maqsadli foydalanish yuzasidan mas’ul ijro etuvchi organ Avtomobil yo‘llari qo‘mitasi hisoblanadi. Uning huzurida loyihani amalga oshirish guruhi tuzilgan. Avtomobil yo‘llari qo‘mitasi raisi loyiha doirasida OTB bilan loyiha bitimini imzolash vakolatiga ega.
OTBning qarz mablag‘larini so‘ndirish, shuningdek, foiz, qarz bo‘yicha komissiya va boshqa to‘lovlar bilan bog‘liq xarajatlar O‘zbekistonning respublika budjeti mablag‘lari hisobidan amalga oshiriladi.
Qaror bilan quyidagilar tasdiqlangan:
- Buxoro loyihasi doirasida OTB tomonidan ajratiladigan qarzni so‘ndirish, foiz va komissiya to‘lovlarini amalga oshirishning prognoz jadvali;
- Surxondaryo loyihasi bo‘yicha loyiha Texnik-iqtisodiy asosining asosiy texnik-iqtisodiy ko‘rsatkichlari;
- Surxondaryo loyihasi doirasida OTB tomonidan ajratiladigan qarzni so‘ndirish, foiz va komissiya to‘lovlarini amalga oshirishning prognoz jadvali.
Avvalroq OTB O‘zbekistonda kasb-hunar ta’limini yaxshilash uchun 93 million dollar ajratishi, Osiyo infratuzilmaviy investitsiyalar banki O‘zbekistonda pandemiya davrida tadbirkorlikni qo‘llab-quvvatlash uchun 200 million dollar ajratgani to‘g‘risida xabar berilgandi.
Izoh (0)