Sirdaryo viloyati Sirdaryo tumani tibbiyot birlashmasi akusherlik kompleksida yetti kilolik chaqaloq tug‘ildi. Bu haqda viloyat Sog‘liqni saqlash boshqarmasi xabar qildi.
Qayd etilishicha, ona va chaqaloqning sog‘lig‘i yaxshi. Ularga shifokor va hamshiralar belgilangan tartibda yordam ko‘rsatmoqda. Chaqaloq kesarcha kesish amaliyoti orqali dunyoga keltirilgan.
“Bu kabi chaqaloqlar Sirdaryo viloyat tarixida birinchi bor tug‘ilishi. Uni dunyoga keltirgan ona asli Sirdaryo tumanidan bo‘lib, 1998-yilda tug‘ilgan. Gigant qizaloq esa uning birinchi farzandi hisoblanadi”, — deyiladi xabarda.
Eslatib o‘tamiz, O‘zbekistonda 2021-yilning yanvar—noyabr oylarida 16 ming 822 nafar egizak chaqaloq tug‘ilgan. 2021-yil 1-dekabr holatiga ko‘ra, O‘zbekistonda 832,4 ming tug‘ilish qayd etilgan. Noyabr oyining o‘zida esa respublikada jami 79 213 ta chaqaloq tug‘ilgan. Davlat statistika qo‘mitasi ma’lumotlariga ko‘ra, O‘zbekistonda 10 yil davomida uch nafar egizaklar tug‘ilishi 4 baravarga ko‘paydi. 2021-yilning birinchi yarmida egizaklar soni bo‘yicha Samarqand viloyati yetakchi bo‘lgan.
Izoh (0)