Тошкент шаҳар ҳокими Жаҳонгир Ортиқхўжаев масъулларга 10 кун муддатда шаҳардаги барча асосий йўллардаги таъмирлаш бўйича топшириқ берди. Бу ҳақда шаҳар ҳокимлиги хабар қилди.
Қайд этилишича, тинимсиз ёмғир ёғиши оқибатида Тошкентдаги асфальт йўллар таъмирталаб аҳволга келган. Ҳоким 10 кун муддатда туман ҳокимларига бутун шаҳардаги хусусий ва давлат техникаларини жалб қилишни буюрган.
«Тушунаман, иш оғир, шаҳримиз катта, кичик эмас. Лекин масъулиятни олишингиз керак, зарур бўлса, кечқурун ишлайсизлар. ЙПХ ходимлари ҳам таъмирлаш ишлари олиб бориладиган ҳудудларни қаттиқ назоратга олиб, ҳаракатни қулайлаштириб беришга масъул бўлади. Агар 10 кундан ўтиб кетса. кечирилмайди. Прокурор ҳамма ишни назорат қилиб, маблағларнинг тўғри сарфланиши ва йўллар сифатини текширади. Бирорта чуқурлик қолмаслиги керак. Сифатсиз йўлни қабул қилмаймиз», — деган Ортиқхўжаев.
Шунингдек, шаҳар ҳокими масъулларга ишчилар эрталаблари дам олиб, кечаси машина йўқ пайти ишлаши кераклигини айтган.
«Таъмирланаётган кўчаларда тирбандлик юзага келмаслиги учун ҳар куни йўллар тозаланади. Ҳаракат юқори вақтида кўчанинг ярмини тўсиб, одамларни сарсон қилиб, асабини бузиб юрманглар. Фуқароларимиздан шикоят тушса, керакли чора кўрилади. Хато қилишга ҳаққинглар йўқ», — дейди Тошкент шаҳар ҳокими.
Изоҳ (0)