Prezident Shavkat Mirziyoyev 2021-yil 19-fevral kuni Namangan viloyatiga tashrifi chog‘ida Namangan shahrining “Bunyodkor” mahallasida bo‘lib, hududda sharoit og‘irligi ortidan shahar hokimi va prokuroriga tanbeh bergandi. Davlat rahbari tashrifidan keyin viloyat hokimi Shavkat Abdurazzoqov o‘sha mahallada yashashini aytgan va hududda konteynerli uy qurdirgandi. Oradan 2 oy o‘tib, 24-aprelda Namangan shahri tarkibida Yangi Namangan tumani tashkil etilgan va “Bunyodkor” mahallasi mazkur tuman hududiga qo‘shilgandi. “Daryo” muxbiri prezident tashrifidan bir yil o‘tib mahallada nimalar o‘zgargani haqida Yangi Namangan tumani hokimi Jobir Abdullayev bilan suhbatlashdi.
“Bunyodkor” eng qoloq mahalla edi
Davlat rahbari 2021-yil fevralda viloyatga tashriflari chog‘ida “Bunyodkor” mahallasiga kelgandi. U paytda ko‘chalardagi devorlar tushib ketgan, nurab yotgan binolarga qarab bo‘lmasdi. Yo‘llar yomonligidan prezident bu yerga 45 daqiqada chiqib kelgandi. Mahallaga biror odamning kelgisi ham kelmasdi. Davlat rahbari hudud holatini ko‘rib, tanqidiy fikrlarini bildirganlar. Prezident ketganidan 4–5 kun o‘tib, viloyat hokimi “Bunyodkor”ga yashash uchun ko‘chib keldi. Viloyat rahbariga konteynerdan uy yasaldi. Viloyat hokimi haftaning shanba va yakshanba kunlari o‘zining uyida qoladi. Dushanbadan jumagacha shu kabinali (konteyner) uyda yashaydi.
Prezident tashriflaridan 2 oy o‘tib Yangi Namangan tumani tashkil etildi. Uning yerlari boshqa tumanlardan qo‘shilgan joylar hissasiga to‘g‘ri keladi, ya’ni asosan, eski Namangan tumanidan qo‘shilgan yerlar. Tumandagi eng qoloq aholi shu yerda bo‘lgan. Eng katta muammo ichimlik suv yo‘qligi edi. Yana aholini qiynab kelgan masalalar yo‘l og‘ir ahvolda ekani, ishsizlik, bog‘cha, maktablar yo‘qligida bo‘lgandi. “Bunyodkor” aholisi 12 ming nafar bo‘lsa, bog‘cha degan so‘zni bilmagan. Prezident tashrifidan keyin viloyat hokimi hududda birinchi o‘rinda bog‘chani ishga tushirib berdi. Hozirda bunaqa zamonaviy bog‘cha Namangan shahrida ham yo‘q.
Suv uchun 200 milliard so‘m
Mahallaga 200 milliard so‘m evaziga ichimlik suv quvuri tortib kelindi. Prezidentimiz kelgan joylarga uzumlar ekildi, tajriba “uchastka”lari qilindi. Ochig‘i, bu yerlardan foydalanilmasdi. Odamlar umidini uzgandi. Chunki suv bo‘lmagan. Hamma tezroq pul topib, shaharga ko‘chib ketishga intilgan. Hozir suv keldi, ko‘chalardagi simyog‘ochlar yangilandi. Asfalt qilindi. To‘g‘risi, bunday o‘zgarishlar odamlarning tushiga ham kirmagan. Yerlar tuproq edi, yurib bo‘lmasdi. Hozir “bruschatka” qilindi. Respublikada yo‘q monomarkaz qurildi. IT-maktab ochildi. Respublikada bunday joy boshqa birorta mahallada uchramaydi.
Konteyner-uyda kuniga 300 nafargacha fuqaro qabul qilinardi
Viloyat hokimi bu yerga ko‘chib kelgach, hududga mas’ullar bilan har kuni ertalab soat 07:00 da shu uy oldida yig‘ilardik. Viloyat hokimi ham chiqardilar. Qarasak, ko‘chada 300 nafargacha fuqaro kutib turgan bo‘lardi. Kosonsoydan deysizmi, Chust, Pop, Uchqo‘rg‘ondanmi, murojaatlar juda ko‘p bo‘lardi. Odamlar nima muammosi bo‘lsa, har kuni ertalab kelardi.
Viloyat hokimi murojaatlarni tinglab, soat 11 gacha ham ishga keta olmas edi. Odam ko‘p, murojaatlar ko‘p, qish kuni sovuq bo‘lishiga qaramay hammani eshitishga harakat qilganmiz. Har kuni tik turib, fuqarolarni qabul qilardik. Viloyat hokimi butun viloyat aholisini shu yerda qabul qildilar. Aytish kerakki, 2 oy shu tarzda ishladik. 3 oy o‘tguncha ham odamlar keti uzilmadi. Oxiri kunlik murojaatlar soni 5–10 tagacha kamaydi. Odamlar deyarli kelmay qo‘ydi. Hozirda viloyat hokimi ertalab kelsa, haftada bir nechta bo‘lmasa, deyarli odam bo‘lmaydi.
Yo‘l uchun 94 milliard so‘m
Avval “Bunyodkor” mahallasi viloyatimizning eng og‘ir sharoitdagi hududi bo‘lgan. Shu holatga olib kelguncha viloyat hokimiga ham, yonidagi tashkilotlar vakillariga ham oson bo‘lmadi, juda qiyin bo‘ldi. Ko‘chalarning hammasi, yo‘l yuzi, barcha xonadonlar oldini suvatib, obodonlashtirdik. Yo‘l bo‘yi cho‘l edi. Shu yerda 800 ga yaqin xonadonda uzumchilik tashkil qilindi.
Hududda hozirda oqava suv ham bor, u haftada 3 marta beriladi. Mahallada qurilgan jami 13 kilometr yo‘l uchun 94 milliard so‘m sarflangan. Tuman tashkil bo‘lgandan beri birorta kirmagan xonadonimiz qolmadi. Hech nima ideal bo‘lmaydi. Albatta, kamchiliklar bor. Mana shu mahallada ham kamchiliklar yetarli. Lekin imkon qadar muammolarga yechim topishga harakat qilyapmiz.
Izoh (0)