O‘zbekistonda besh yillik ish tajribasiga ega xotin-qizlar OTMlarga imtihonsiz qabul qilinishi mumkin

Oila va xotin-qizlar davlat qo‘mitasi “Mutaxassisligi bo‘yicha kamida besh yil mehnat stajiga ega bo‘lgan xotin-qizlarni oliy ta’lim muassasalariga to‘lov-kontrakt asosida o‘qishga qabul qilish tartibini tasdiqlash haqida”gi Vazirlar Mahkamasi qarori loyihasini muhokamaga qo‘ydi.

Hujjat loyihasida mutaxassisligi bo‘yicha kamida besh yil ish stajiga ega bo‘lgan xotin-qizlarni oliy ta’lim muassasalariga to‘lov-kontrakt asosida o‘qishga qabul qilish tartibi to‘g‘risidagi nizomni tasdiqlash va 2022-yil 1-maydan boshlab uni kuchga kiritish taklif etilmoqda. Shuningdek, quyidagilarni nazarda tutuvchi tartib o‘rnatiladi:

• alohida kvotalarni davlat oliy ta’lim muassasalari kesimida taqsimlash tartibi;
• mutaxassisligi bo‘yicha kamida besh yil ish stajiga ega, lekin oliy ma’lumotga ega bo‘lmagan xotin-qizlarga tavsiyanoma berish tartibi;
• alohida test sinovlarini o‘tkazish tartibi.

Qaror loyihasiga muvofiq xotin-qizlarga tavsiyanoma Oila va xotin-qizlar davlat qo‘mitasi tomonidan bir marta beriladi hamda tavsiyanoma berilgan kundan boshlab 3 yil muddatga amal qiladi. Tegishli tavsiyanomaga ega bo‘lgan xotin-qizlar har yili oliy ta’lim muassasalarining bakalavriat ta’lim yo‘nalishiga kirish uchun hujjatlarni topshirish muddatlarida o‘rnatilgan tartibda maxsus elektron tizim orqali ro‘yxatdan o‘tkaziladi.

Qo‘mita tavsiyanomalariga asosan davlat oliy ta’lim muassasalarining bakalavriat ta’lim yo‘nalishlariga umumiy qabul parametrlaridan tashqari alohida test sinovlari Vazirlar Mahkamasining “Oliy ta’lim muassasalariga o‘qishga qabul qilish tartibini yanada takomillashtirish to‘g‘risida”gi, 2019-yil 7-iyundagi “Oliy ta’lim muassasalariga o‘qishga kirish uchun hujjatlarni qabul qilish bo‘yicha davlat xizmatlarini ko‘rsatishning ma’muriy reglamentini tasdiqlash to‘g‘risida”gi qarorlariga muvofiq amalga oshiriladi.

Oliy va o‘rta maxsus ta’lim vazirligi manfaatdor vazirlik va idoralar bilan birgalikda o‘zlari qabul qilgan normativ-huquqiy hujjatlarni ikki oy muddatda ushbu qarorga muvofiqlashtirishi lozim bo‘ladi.

Bundan oldin O‘zbekistonda talaba qizlar uchun 7 yil muddatga foizsiz kredit berish joriy qilinishi, 2022/2023-o‘quv yilidan boshlab magistraturada o‘qiyotgan qizlarning kontrakt pullarini budjetdan qoplash uchun har yili 200 milliard so‘m mablag‘ yo‘naltirilishi to‘g‘risida xabar berilgandi.