Наманган вилояти ҳокими бугундан бошлаб Наманган шаҳридаги «Бунёдкор» маҳалласида истиқомат қилишини билдирди. Бу ҳақда «Дарё» мухбири Азизбек Абдувалиев хабар бермоқда.

Фото: Наманган вилояти ҳокимлиги ахборот хизмати

Шавкат Абдураззоқов бу ҳақда маҳалла аҳолиси билан учрашуви давомида маълум қилган.

«Ҳар куни шу ерда, сизларга қўшни бўламан. Уйим маҳалла идорасининг рўпарасида жойлашади. Бугун шу ерга контейнер ўрнатилади ва унга ‘вилоят ҳокимининг уйи’ деб ёзиб қўйилади. Бу ердаги ҳолатни ўнглаб, кейин бошқа ҳолати оғир ҳудудга ўтамиз», — деди Шавкат Абдураззоқов.

Фото: Наманган вилояти ҳокимлиги ахборот хизмати

Бугун эрта тонгдан ушбу маҳаллага юзлаб ишчи-ходим ва ҳашарчилар жалб этилди. Шаҳарнинг чекка ҳудудида ерларни текислаш, электр тармоқлари тортиш, ободонлаштириш ишлари бошланди. Узоқ йиллар давомида фойдаланишда бўлган чиқиндихона ёпиладиган, маҳалла идораси эса қайтадан қуриладиган бўлди.

Фото: Наманган вилояти ҳокимлиги ахборот хизмати

Энг асосийси, маҳаллага тоза ичимлик суви келтирилади.

«Бу ерда 3 гектар жойда кичик саноат зонаси ташкил этамиз ва камида 10 та корхона очамиз. Бунинг ортидан 12 минг киши яшайдиган маҳаллада 1000 нафар одам ишли бўлади», — деди вилоят ҳокими.

Фото: Наманган вилояти ҳокимлиги ахборот хизмати

Эслатиб ўтамиз, Президент Шавкат Мирзиёев 19 февраль куни «Бунёдкор» маҳалласида бўлган ва ичимлик суви йўқ, ички йўллар ёмон, атроф ободонлаштирилмаган ҳудуддаги аҳвол учун шаҳар ҳокими ва прокурорига танбеҳ берганди.

Фото: Наманган вилояти ҳокимлиги ахборот хизмати