1-aprel holatiga ko‘ra, O‘zbekistonda turk kapitali ishtirokidagi 1961 ta kompaniya faoliyat yuritmoqda. Bu haqda Davlat statistika qo‘mitasi ma’lumotlarida qayd etildi.
Bu Rossiya (2390) va Xitoydan (1967) keyingi uchinchi ko‘rsatkichdir. Umumiy korxonalar soni bo‘yicha Rossiya 17,5 foiz ulushga ega bo‘lsa, Xitoy va Turkiya 14,4 foizdan ulushga ega.
2022-yilning yanvar—mart oyida turk tadbirkorlari ishtiroki bilan O‘zbekistonda 95 ta, xitoyliklar bilan esa 45 ta yangi korxona tashkil qilingan.
Jadal o‘sish 2021-yilda, turk kapitali ishtirokidagi 407 ta yangi korxona tashkil etilgan paytga to‘g‘ri keldi.
Bu eng yuqori ko‘rsatkich bo‘lib, ikkinchi o‘rinni Rossiya (365 ta kompaniya), uchinchi o‘rinni Xitoy (266 ta kompaniya) egallagan.
Nima uchun Turkiya O‘zbekistonda shunchalik faol?
Turk tadbirkorlarining so‘zlariga ko‘ra, so‘nggi yillardagi Turkiya iqtisodiyoti yuzaga kelgan inqiroz tufayli qiyinchiliklarni boshdan kechirmoqda, tadbirkorlar esa ushbu holatni boshqa bozorlarga chiqish orqali qoplashni rejalashtirmoqda.Fevral oyining o‘rtalarida Fitch agentligi Turkiya reyting prognozini “salbiy”gacha tushirdi. Fitch mutaxassislarining fikriga ko‘ra, past reytingga yuqori inflyatsiya holati, tashqi likvidlikning pastligi va mamlakat siyosatiga bo‘lgan ishonchsizlik kabi bir necha omillar sabab bo‘lgan.
Turk lirasi 2021-yilning oxirlarida o‘z bahosining yarmini yo‘qotgan. Mamlakat markaziy banki kerakli choralarni ko‘rdi, biroq inflyatsiya holati 48,7 foizgacha oshdi. Mazkur ko‘rsatkich so‘nggi 20 yil ichidagi eng yuqori deb belgilandi.
Avvalroq Turkiya hukumati vakillari aholidan milliy valyuta qiymatini saqlab qolish uchun dollar valyutasidan voz kechishni so‘ragani haqida xabar berilgan edi.
Izoh (0)