Bugun aksar davlat idoralari xodimlari uchun natija emas, ochko olish muhim bo‘lib qolgan. Bu haqda Madaniyat vaziri Ozodbek Nazarbekov “O‘zbekiston” telekanaliga bergan intervyusida fikr bildirdi.
Vazirning aytishicha, bugungi kunda moddiy manfaat hayotda hal qiluvchi kuch bo‘lib qolgan. Shu sabab ayrimlar ochko uchun ishlaydi, natija uchun emas. Aslida natijadan rohat olish muhim.
“Men ko‘proq davlat idora xodimlarida kuzatayotgan narsa shuki, natija emas, ochko olish muhim. Tushuntira oldimmi? Agar menga ochko bermasa, natijasi qiziq emas. Agar undan qanaqadir bir olqish olmasam, shaxsiy manfaat bo‘lmasa, uning natijasi nima bo‘lsa bo‘lsin, menga qiziq emas. Mana shu o‘rinlarni almashtirishimiz kerak. Natijaga rozi bo‘ladigan bo‘lishimiz lozim. Natijadan rohat oladigan bo‘lishimiz kerak. Bugun o‘sha bir ish qilib, uning natijasidan rohat tuyib, qalbi xotirjam bo‘lish uchun maqsad pok bo‘lishi kerak. Masalan, “men tadbirkor va boy bo‘laman, 10 ta samolyotim bo‘ladi, mana bunaqa bitta rayonni sotib olaman, unday bo‘ladi, bunday bo‘ladi, degan maqsad bilan biznesga kirish bor. Lekin “men boy bo‘lsam, hamma ehtiyojmandlarning yonida turaman”, deb biznes qilish bor. Yaʼni bugun agar biz o‘sha maqsadlarimizni natijaga qaratmas ekanmiz, “natija bo‘lsagina men rozi bo‘laman”. Uning undan keladigan moddiy manfaati yoki olqish, boshqa narsalarga mast bo‘lmayman. Qachonki, natija bo‘lsa, men shunda rozi bo‘laman, deyilsa, bilasizmi, qanaqa ishlashni boshlaymiz”, dedi vazir.
Avvalroq Ozodbek Nazarbekov “festivallar o‘tkazish ko‘chani asfalt qilishdan ko‘ra muhimroq”, deya fikr bildirgandi. Shu bilan birga, Madaniyat vaziri “Ovoz” loyihasiga sarflangan 2 mlrd so‘m uchun malomat qilmaslikni so‘ragan.
Izoh (0)