Президент Шавкат Мирзиёев 2021 йил 19 февраль куни Наманган вилоятига ташрифи чоғида Наманган шаҳрининг «Бунёдкор» маҳалласида бўлиб, ҳудудда шароит оғирлиги ортидан шаҳар ҳокими ва прокурорига танбеҳ берганди. Давлат раҳбари ташрифидан кейин вилоят ҳокими Шавкат Абдураззоқов ўша маҳаллада яшашини айтган ва ҳудудда контейнерли уй қурдирганди. Орадан 2 ой ўтиб, 24 апрелда Наманган шаҳри таркибида Янги Наманган тумани ташкил этилган ва «Бунёдкор» маҳалласи мазкур туман ҳудудига қўшилганди. «Дарё» мухбири президент ташрифидан бир йил ўтиб маҳаллада нималар ўзгаргани ҳақида Янги Наманган тумани ҳокими Жобир Абдуллаев билан суҳбатлашди.
«Бунёдкор» энг қолоқ маҳалла эди
Давлат раҳбари 2021 йил февралда вилоятга ташрифлари чоғида «Бунёдкор» маҳалласига келганди. У пайтда кўчалардаги деворлар тушиб кетган, нураб ётган биноларга қараб бўлмасди. Йўллар ёмонлигидан президент бу ерга 45 дақиқада чиқиб келганди. Маҳаллага бирор одамнинг келгиси ҳам келмасди. Давлат раҳбари ҳудуд ҳолатини кўриб, танқидий фикрларини билдирганлар. Президент кетганидан 4–5 кун ўтиб, вилоят ҳокими «Бунёдкор»га яшаш учун кўчиб келди. Вилоят раҳбарига контейнердан уй ясалди. Вилоят ҳокими ҳафтанинг шанба ва якшанба кунлари ўзининг уйида қолади. Душанбадан жумагача шу кабинали (контейнер) уйда яшайди.
Президент ташрифларидан 2 ой ўтиб Янги Наманган тумани ташкил этилди. Унинг ерлари бошқа туманлардан қўшилган жойлар ҳиссасига тўғри келади, яъни асосан, эски Наманган туманидан қўшилган ерлар. Тумандаги энг қолоқ аҳоли шу ерда бўлган. Энг катта муаммо ичимлик сув йўқлиги эди. Яна аҳолини қийнаб келган масалалар йўл оғир аҳволда экани, ишсизлик, боғча, мактаблар йўқлигида бўлганди. «Бунёдкор» аҳолиси 12 минг нафар бўлса, боғча деган сўзни билмаган. Президент ташрифидан кейин вилоят ҳокими ҳудудда биринчи ўринда боғчани ишга тушириб берди. Ҳозирда бунақа замонавий боғча Наманган шаҳрида ҳам йўқ.
Сув учун 200 миллиард сўм
Маҳаллага 200 миллиард сўм эвазига ичимлик сув қувури тортиб келинди. Президентимиз келган жойларга узумлар экилди, тажриба «участка»лари қилинди. Очиғи, бу ерлардан фойдаланилмасди. Одамлар умидини узганди. Чунки сув бўлмаган. Ҳамма тезроқ пул топиб, шаҳарга кўчиб кетишга интилган. Ҳозир сув келди, кўчалардаги симёғочлар янгиланди. Асфальт қилинди. Тўғриси, бундай ўзгаришлар одамларнинг тушига ҳам кирмаган. Ерлар тупроқ эди, юриб бўлмасди. Ҳозир «брусчатка» қилинди. Республикада йўқ мономарказ қурилди. IT-мактаб очилди. Республикада бундай жой бошқа бирорта маҳаллада учрамайди.
Контейнер-уйда кунига 300 нафаргача фуқаро қабул қилинарди
Вилоят ҳокими бу ерга кўчиб келгач, ҳудудга масъуллар билан ҳар куни эрталаб соат 07:00 да шу уй олдида йиғилардик. Вилоят ҳокими ҳам чиқардилар. Қарасак, кўчада 300 нафаргача фуқаро кутиб турган бўларди. Косонсойдан дейсизми, Чуст, Поп, Учқўрғонданми, мурожаатлар жуда кўп бўларди. Одамлар нима муаммоси бўлса, ҳар куни эрталаб келарди.
Вилоят ҳокими мурожаатларни тинглаб, соат 11 гача ҳам ишга кета олмас эди. Одам кўп, мурожаатлар кўп, қиш куни совуқ бўлишига қарамай ҳаммани эшитишга ҳаракат қилганмиз. Ҳар куни тик туриб, фуқароларни қабул қилардик. Вилоят ҳокими бутун вилоят аҳолисини шу ерда қабул қилдилар. Айтиш керакки, 2 ой шу тарзда ишладик. 3 ой ўтгунча ҳам одамлар кети узилмади. Охири кунлик мурожаатлар сони 5–10 тагача камайди. Одамлар деярли келмай қўйди. Ҳозирда вилоят ҳокими эрталаб келса, ҳафтада бир нечта бўлмаса, деярли одам бўлмайди.
Йўл учун 94 миллиард сўм
Аввал «Бунёдкор» маҳалласи вилоятимизнинг энг оғир шароитдаги ҳудуди бўлган. Шу ҳолатга олиб келгунча вилоят ҳокимига ҳам, ёнидаги ташкилотлар вакилларига ҳам осон бўлмади, жуда қийин бўлди. Кўчаларнинг ҳаммаси, йўл юзи, барча хонадонлар олдини суватиб, ободонлаштирдик. Йўл бўйи чўл эди. Шу ерда 800 га яқин хонадонда узумчилик ташкил қилинди.
Ҳудудда ҳозирда оқава сув ҳам бор, у ҳафтада 3 марта берилади. Маҳаллада қурилган жами 13 километр йўл учун 94 миллиард сўм сарфланган. Туман ташкил бўлгандан бери бирорта кирмаган хонадонимиз қолмади. Ҳеч нима идеал бўлмайди. Албатта, камчиликлар бор. Мана шу маҳаллада ҳам камчиликлар етарли. Лекин имкон қадар муаммоларга ечим топишга ҳаракат қиляпмиз.
Изоҳ (0)