O‘zbekistonda bino va inshootlarning energiya samaradorligini oshirish milliy dasturi tasdiqlanadi

Qurilish vazirligi “Uy-joy-kommunal xo‘jaligi, ijtimoiy soha obyektlari va boshqa sohalarda qayta tiklanuvchi energiya manbalarini keng joriy etish hamda bino-inshootlarning energiya samaradorligini oshirish tizimini yanada takomillashtirish to‘g‘risida”gi prezident qarori loyihasini muhokamaga qo‘ydi.

Hujjat bilan “Ijtimoiy, tijorat va ma’muriy-maishiy bino va inshootlarning energiya samaradorligini oshirish” milliy dasturi tasdiqlanadi. Dasturni moliyalashtirish manbalari etib quyidagilar belgilanadi:

• bino va inshootlar egalarining o‘z mablag‘lari;
• tijorat banklari, xalqaro moliya institutlari tomonidan ajratilayotgan imtiyozli kreditlar;
• davlat va mahalliy byudjet mablag‘lari, shuningdek subsidiyalar ajratilishi;
• amalga oshirilgan energiya tejash chora-tadbirlari natijasida tejalgan mablag‘larni qayta moliyalashtirish;
• qonunchilikda taqiqlanmagan boshqa mablag‘lar.

Qarorga muvofiq Energetika vazirligi, Uy-joy kommunal xizmat ko‘rsatish vazirligi va Qurilish vazirligining quyidagi takliflariga rozilik beriladi:

• shaharsozlik normalari va qoidalarida belgilangan tartibda ko‘p kvartirali va ko‘p qavatli uy-joylarni foydalanishga topshirilishida kichik quyosh fotoelektrik stansiyalari, gelio quyosh uskunalari kabi elektr va issiqlik energiyasini tejovchi qurilmalar o‘rnatilmagan ko‘p qavatli uy-joylarni Energetika vazirligining kelishuvisiz foydalanishga qabul qilmaslik;
• qurilish tashkilotlari tomonidan binolar va inshootlarni energiyasamaradorligi talablariga va ularni optimal me’moriy, funksional texnologik, konstruktorlik va texnik-muhandislik yechimlarini tanlash orqali foydalaniladigan energiya resurslari uchun o‘lchov asboblari bilan jihozlash talablariga javob berishini, shuningdek, qurilish, rekonstruksiya va mukammal ta’mirlash paytida ularni to‘g‘ri amalga oshirilishini va standartlarni, texnik dizayn yechimlari kataloglarini muntazam yangilanishini ta’minlash;
• bino va inshootlarning alohida elementlariga, konstruksiyalariga va ularda foydalaniladigan uskunalar va texnologiyalarga qo‘yiladigan talablar, shuningdek, qurilishi, qayta qurish, mukammal ta’mirlash jarayonida hamda ekspluatatsiya qilish jarayonida energiya resurslarining isrofgarchiligini bartaraf etish imkonini beruvchi qo‘llaniladigan va loyiha hujjatlariga kiritiladigan talablarni joriy etilishini tashkil qilish;
• korxona va tashkilotlarning bino va inshootlari uchun sarflanayotgan energiya resurslarining 25 foizini qayta tiklanuvchi energiya manbalari hisobidan qoplash;
• ijtimoiy soha obyektlari va boshqa byudjet tashkilotlarining rahbarlari va ma’sul xodimlariga qayta tiklanuvchi energiya manbalarini joriy etilishida ko‘rsatgan tashabbuskorliklarini rag‘batlantirish;
• bino va inshootlarning energiya samaradorligini oshirishda energiya servis kompaniyalari xizmatlarini yo‘lga qo‘yish.

Iqtisodiy taraqqiyot va kambag‘allikni qisqartirish vazirligi, Davlat soliq ko‘mitasi, Energetika vazirligi, Qoraqalpog‘iston Respublikasi Vazirlar Kengashi, viloyatlar va Toshkent shahar hokimliklari bilan birgalikda uch oy muddatda “Qishloq xo‘jaligiga mo‘ljallanmagan yer uchastkalarini xususiylashtirish to‘g‘risida”gi qonuni hamda “Yer munosabatlarida tenglik va shaffoflikni ta’minlash, yerga ega bo‘lgan huquqlarni ishonchli himoya qilish va ularni bozor aktiviga aylantirish chora-tadbirlari to‘g‘risida”gi prezident farmoniga muvofiq bino va inshootlar energiya samaradorligini oshirishni moliyalashtirish manbalari va mexanizmlaridan foydalanish bo‘yicha takliflarni Vazirlar Mahkamasiga kiritadi.

Bunda yer uchastkasini sotib olish uchun sarflanadigan mablag‘larni, qayta tiklanuvchi energiya manbalari qurilmalarini ishlab chiqaruvchilardan ushbu qurilmalarni sotib olish va o‘rnatish uchun hamda energiyani tejash va energiya samaradorligini oshirishga doir chora-tadbirlarni moliyalashtirishga yo‘naltirilishi nazarda tutilishi kerak.