Ўзбекистонда бино ва иншоотларнинг энергия самарадорлигини ошириш миллий дастури тасдиқланади

Қурилиш вазирлиги «Уй-жой-коммунал хўжалиги, ижтимоий соҳа объектлари ва бошқа соҳаларда қайта тикланувчи энергия манбаларини кенг жорий этиш ҳамда бино-иншоотларнинг энергия самарадорлигини ошириш тизимини янада такомиллаштириш тўғрисида»ги президент қарори лойиҳасини муҳокамага қўйди.

Ҳужжат билан «Ижтимоий, тижорат ва маъмурий-маиший бино ва иншоотларнинг энергия самарадорлигини ошириш» миллий дастури тасдиқланади. Дастурни молиялаштириш манбалари этиб қуйидагилар белгиланади:

• бино ва иншоотлар эгаларининг ўз маблағлари;
• тижорат банклари, халқаро молия институтлари томонидан ажратилаётган имтиёзли кредитлар;
• давлат ва маҳаллий бюджет маблағлари, шунингдек субсидиялар ажратилиши;
• амалга оширилган энергия тежаш чора-тадбирлари натижасида тежалган маблағларни қайта молиялаштириш;
• қонунчиликда тақиқланмаган бошқа маблағлар.

Қарорга мувофиқ Энергетика вазирлиги, Уй-жой коммунал хизмат кўрсатиш вазирлиги ва Қурилиш вазирлигининг қуйидаги таклифларига розилик берилади:

• шаҳарсозлик нормалари ва қоидаларида белгиланган тартибда кўп квартирали ва кўп қаватли уй-жойларни фойдаланишга топширилишида кичик қуёш фотоэлектрик станциялари, гелио қуёш ускуналари каби электр ва иссиқлик энергиясини тежовчи қурилмалар ўрнатилмаган кўп қаватли уй-жойларни Энергетика вазирлигининг келишувисиз фойдаланишга қабул қилмаслик;
• қурилиш ташкилотлари томонидан бинолар ва иншоотларни энергиясамарадорлиги талабларига ва уларни оптимал меъморий, функционал технологик, конструкторлик ва техник-муҳандислик ечимларини танлаш орқали фойдаланиладиган энергия ресурслари учун ўлчов асбоблари билан жиҳозлаш талабларига жавоб беришини, шунингдек, қурилиш, реконструкция ва мукаммал таъмирлаш пайтида уларни тўғри амалга оширилишини ва стандартларни, техник дизайн ечимлари каталогларини мунтазам янгиланишини таъминлаш;
• бино ва иншоотларнинг алоҳида элементларига, конструкцияларига ва уларда фойдаланиладиган ускуналар ва технологияларга қўйиладиган талаблар, шунингдек, қурилиши, қайта қуриш, мукаммал таъмирлаш жараёнида ҳамда эксплуатация қилиш жараёнида энергия ресурсларининг исрофгарчилигини бартараф этиш имконини берувчи қўлланиладиган ва лойиҳа ҳужжатларига киритиладиган талабларни жорий этилишини ташкил қилиш;
• корхона ва ташкилотларнинг бино ва иншоотлари учун сарфланаётган энергия ресурсларининг 25 фоизини қайта тикланувчи энергия манбалари ҳисобидан қоплаш;
• ижтимоий соҳа объектлари ва бошқа бюджет ташкилотларининг раҳбарлари ва маъсул ходимларига қайта тикланувчи энергия манбаларини жорий этилишида кўрсатган ташаббускорликларини рағбатлантириш;
• бино ва иншоотларнинг энергия самарадорлигини оширишда энергия сервис компаниялари хизматларини йўлга қўйиш.

Иқтисодий тараққиёт ва камбағалликни қисқартириш вазирлиги, Давлат солиқ кўмитаси, Энергетика вазирлиги, Қорақалпоғистон Республикаси Вазирлар Кенгаши, вилоятлар ва Тошкент шаҳар ҳокимликлари билан биргаликда уч ой муддатда «Қишлоқ хўжалигига мўлжалланмаган ер участкаларини хусусийлаштириш тўғрисида»ги қонуни ҳамда «Ер муносабатларида тенглик ва шаффофликни таъминлаш, ерга эга бўлган ҳуқуқларни ишончли ҳимоя қилиш ва уларни бозор активига айлантириш чора-тадбирлари тўғрисида»ги президент фармонига мувофиқ бино ва иншоотлар энергия самарадорлигини оширишни молиялаштириш манбалари ва механизмларидан фойдаланиш бўйича таклифларни Вазирлар Маҳкамасига киритади.

Бунда ер участкасини сотиб олиш учун сарфланадиган маблағларни, қайта тикланувчи энергия манбалари қурилмаларини ишлаб чиқарувчилардан ушбу қурилмаларни сотиб олиш ва ўрнатиш учун ҳамда энергияни тежаш ва энергия самарадорлигини оширишга доир чора-тадбирларни молиялаштиришга йўналтирилиши назарда тутилиши керак.