«Реал» ёзда «ПСЖ» ҳужумчиси Килиан Мбаппе билан шартнома имзолашига ишонмоқда.
Журналист Жанлука ди Марционинг хабарига кўра, июнь ойида «ПСЖ» билан шартномаси якунига етадиган ҳужумчи билан Мадрид жамоаси ўртасида оғзаки келишув мавжуд. Аммо Мбаппе сўзида туриш ё турмаслиги номаълум.
Агар Килиан «Реал»га ўтишга рози бўлса, йилига 50 миллион евролик маошга эга 5 йилга мўлжалланган шартнома ва 100 миллион евро бонусга эга бўлади.
«Қироллик клуби» 23 ёшли футболчи билан битим имзоланишига ишонмоқда. Мадридликлар Мбаппе билан худди Криштиану Роналду билан бўлгани каби битим олди келишуви имзоламоқчи бўлган.
«Реал» португалиялик ҳужумчи билан 2008 йилнинг ёзида, трансфер амалга ошишидан бир йил олдин келишиб олганди. Нотариал тасдиқланган битимга кўра, «Манчестер Юнайтед» 96 миллион евро олиши кўрсатилган. Агар шартнома футболчи ёки Мадрид клуби томонидан бузиладиган бўлса, 30 миллион евро миқдорида жарима белгиланган эди.
Мадрид клуби француз билан ҳам худди шундай битим имзолашни мақсад қилган эди, аммо Мбаппе бунга рад жавобини берган.
«ПСЖ» футболчини ўз сафида олиб қолиш учун ҳаракат қилмоқда. Футболчи эса ҳозирча якуний қарор қабул қилгани йўқ.
Килиан Мбаппе 2021/22 йилги мавсум парижликлар сафида барча мусобақаларда 39 та ўйинда иштирок этиб, 31 та гол ва 18 та голли узатмага муаллифлик қилган.
Изоҳ (0)