«Марказлашган манбалар ҳисобидан ипотека ва таълим кредитлари учун ажратиладиган маблағлар бўйича фоиз ставкаларини белгилаш тўғрисида»ги президент қарори қабул қилинди. Қарорга кўра, Ўзбекистонда ипотека дастурлари ва таълим кредитлари бўйича фоиз ставкалари йил охиригача ўзгаришсиз қолади.
Ҳужжат билан Молия вазирлиги томонидан тижорат банкларига ипотека ва таълим кредити учун ажратиладиган ресурс маблағлари бўйича фоиз ставкаларини 2022 йил якунига қадар, истисно тариқасида, амалдаги фоиз ставкаларида, яъни ипотека кредити бўйича — 13 фоиз, таълим кредити бўйича — 10 фоиз миқдорида сақлаб қолиш маъқулланган. Бунда, 10 фоиз ставкада ажратилган ресурслар ҳисобидан таълим кредитлари тижорат банклари томонидан кредит олувчига 14 фоиздан ажратилади.
Белгиланишича, Молия вазирлиги томонидан ажратилган ресурс маблағлари ҳамда тижорат банкларининг ипотека ва таълим кредитлари бўйича фоиз ставкаларини мутаносиб равишда камайтириш механизми Марказий банкнинг асосий ставкаси 14 фоиздан пасайганда қўлланилади.
Эслатиб ўтамиз, март ўрталарида Ўзбекистонда асосий ставка 2018 йилдан бери биринчи марта кўтарилди. Молия вазири Тимур Ишметов Марказий банк ставкаси оширилганига қарамай, таълим ва ипотека кредитлари фоз ставкалари йил охиригача ўзгаришсиз қолишини маълум қилганди. Қайд этилишича, президент макроиқтисодий барқарорликни таъминлаш бўйича топшириқлар берган. Жумладан, Марказий банкнинг асосий ставкани 14 фоиздан 17 фоизга ўзгартириши ташқи омил таъсирида вақтинчалик чора сифатида кўрилмоқда.
Изоҳ (0)