Ijtimoiy tarmoqlarda Qarshi shahridagi “Versal” to‘yxonasi yaqinida yong‘in bo‘layotgani haqida xabar berildi. Viloyat Favqulodda vaziyatlar boshqarmasi xabarga aniqlik kiritib, yonilg‘i tashuvchi avtomobilda yong‘in sodir bo‘lganini ma’lum qildi.
“Ushbu holat bo‘yicha bugun soat taxminan 15:12 da Qarshi shahar Favqulodda vaziyatlar bo‘limiga xabar kelib tushgan. Xabarga ko‘ra, voqea joyiga bitta bo‘linma soat 15:23 da yetib borib, yong‘inni 15:29 da to‘liq o‘chirgan”, — deydi boshqarma axborot xizmati rahbari Sohib Vaitov.
Mas’ulning qo‘shimcha qilishicha, Qarshi shahridagi Star Oil avtomobillarga yonilg‘i quyish shoxobchasi hovlisida Qarshi tumani “Ko‘chkak” mahallasida yashovchi 26 yoshli haydovchi A.X. boshqaruvidagi qora rangli, davlat belgisi 70 Z 371 NA rusumli yonilg‘i tashuvchi “Benzavoz”ning motor qismida yong‘in kelib chiqqan.
Yong‘indan hech kim tan jarohati olmagan. Hozirda yong‘in sababi va zarari aniqlanmoqda.
Izoh (0)