Shavkat Mirziyoyev raisligida 8-aprel kuni Saxovat, Muruvvat va Mehribonlik uylari hamda maxsus maktab internatlari faoliyati bo‘yicha videoselektor yig‘ilishi bo‘lib o‘tdi, deb xabar berdi “Daryo” muxbiri.
Prezident videoselektor davomida Toshkent viloyati hokimi Zoir Mirzayev bilan ham suhbatda bo‘ldi. Shavkat Mirziyoyev hokimga zarur topshiriqlarni berdi. Davlat rahbari muloqot davomida Zoir Mirzayevdan o‘zi Muruvvat uyiga bormaganida hokim qachon borishini so‘radi.
“Har bir uchrashuvda bizning ko‘zimizni ochasiz. Agar siz Muruvvat uyiga bormaganingizda, biz qog‘ozga ishonib, hammasi yaxshi, deb yuraverar edik”, — dedi Toshkent viloyati hokimi.
Zoir Mirzayev prezidentga viloyatdagi tibbiyot xodimlari uchun ish joyida bepul tushlik va kechki ovqatni tashkil etish bo‘yicha taklif berdi. Davlat rahbari mazkur taklifni ma’qulladi.
Shuningdek, hokim prezidentga nogironligi bor shaxslarning iltimosini yetkazdi.
“Agar Muruvvat uyiga nogironlar keladigan bo‘lsa, shu kundan boshlab ularning maxsus nafaqalari to‘xtar ekan. Ular hech bo‘lmasa, 10 foizini bersa edi, deyishyapti”, — dedi hokim.
Shavkat Mirziyoyev bu moliya tizimining eski g‘oyalari bilan qolib ketgan qoida ekanligini aytdi.
“Albatta, ko‘rib chiqib, adolatli qaror qilinadi. Axir ular nogiron bo‘lsa-yu, yana ularning qadrini joyiga qo‘ymasak, to‘g‘ri bo‘lmaydi”, — dedi prezident.
Mavzuga doir:
Izoh (0)