O‘zbekistonda Ramazon oyining ilk haftasida amalga oshirilgan xayriyalar to‘g‘risida ma’lumot berildi

O‘zbekistonda Ramazon oyining ilk haftasida uch mingga yaqin xonadonlarga 473,93 million so‘mlik oziq-ovqat mahsulotlari tarqatildi. Bu haqda O‘zbekiston musulmonlari idorasi mas’ul xodimi Ne’mat Musayev AOKAda o‘tkazilgan brifingda ma’lum qildi.

Brifingda “Vaqf” xayriya jamoat fondi tomonidan Ramazon oyining ilk haftasida amalga oshirilgan xayriyalar haqida axborot berilgan. Ma’lumotlarga ko‘ra, o‘tgan bir hafta ichida moddiy ko‘makka muhtoj 149 nafar shaxsga 128 million so‘mlik pul mablag‘lari yetkazilgan. Shuningdek:

• Farg‘ona viloyatida yashovchi jazoni ijro etish muassasasidan ozod etilgan 15 nafar fuqaroga xayriya tadbiri uchun 4,6 million so‘m;
• Islom sivilizatsiyasi markazi tashabbusi bilan o‘tkazilgan “Kitob – kamolot kaliti” ko‘rgazmasi ishtirokchilarini rag‘batlantirish uchun 4 million so‘m mablag‘ ajratilib, haqdorlarga yetkazilgan.

Ma’lumot uchun, O‘zbekiston prezidentining 2018-yil 16-apreldagi “Diniy-ma’rifiy soha faoliyatini tubdan takomillashtirish chora-tadbirlari to‘g‘risida”gi farmoniga muvofiq O‘zbekiston musulmonlari idorasi huzurida “Vaqf” xayriya jamoat fondi tashkil etilgan. “Vaqf” xayriya jamoat fondining asosiy vazifalari fuqarolarning diniy, ma’naviy va intellektual salohiyatini oshirishga qaratilgan tashabbuslarini qo‘llab-quvvatlash, milliy va diniy qadriyatlarimizni asrab-avaylash, masjidlar va diniy ta’lim muassasalarining binolarini qurish, ta’mirlash, rekonstruksiya qilish, obodonlashtirish, moddiy-texnik bazasini mustahkamlashdan iborat.