Davlat xavfsizlik xizmatining Toshkent viloyati bo‘yicha boshqarmasi xodimlari tomonidan o‘tkazilgan tezkor qidiruv tadbirlari natijasida Chinoz tumanidagi tijorat banklaridan birining xodimi sodir etgan noqonuniy faoliyat fosh etildi. Bu haqda DXX axborot xizmati xabar qildi.
Qayd etilishicha, X.A. mansab vakolatini suiiste’mol qilgan holda 2020-yilda turmush o‘rtog‘i nomiga dehqon xo‘jaligi tashkil etgan. Uni o‘zi ishlaydigan bank ta’minotchisi sifatida ro‘yxatdan o‘tkazgan. So‘ngra “Har bir oila — tadbirkor” dasturi doirasida 15 nafar fuqaroga ajratilgan jami 397,3 million so‘mlik imtiyozli kredit mablag‘larini dehqon xo‘jaligi hisob raqamiga o‘tkazib, fuqarolarga naqdlashtirib bergan.
Shuningdek, X.A. 2021-yilda 3 nafar yaqin tanishi nomiga dehqon xo‘jaliklari tashkil qilib, ularni ham bank ta’minotchisi sifatida ro‘yxatdan o‘tkazgan. “Har bir oila — tadbirkor” dasturi doirasida 71 nafar fuqaroga ajratilgan jami 2 milliard 182 million so‘mlik imtiyozli kredit mablag‘larini ushbu xo‘jaliklar orqali naqdlashtirib berishi oqibatida mablag‘lar maqsadsiz sarflangan.
Bundan tashqari, 2020-yilda 10 nafar fuqaroning nomiga ularning xabardorligisiz hujjatlarni soxtalashtirish yo‘li bilan mini pechlar xarid qilish uchun 60 million so‘m miqdorida kredit ajratilishiga erishgan. Ularni ham o‘ziga tegishli ta’minotchi dehqon xo‘jaligi hisobiga o‘tkazib, talon-toroj qilgan.
Hozirda X.A.ga nisbatan Jinoyat kodeksining 167- (o‘zlashtirish yoki rastrata yo‘li bilan talon-toroj qilish), 205- (hokimiyat yoki mansab vakolatini suiiste’mol qilish) va 209-moddalari (mansab soxtakorligi) bilan jinoyat ishi qo‘zg‘atilgan. Hozirda tergov harakatlari olib borilmoqda.
Mavzuga doir:
Izoh (0)