Shavkat Mirziyoyev 8-aprel kuni Toshkent shahar Olmazor tumanidagi 102-sonli zaif eshituvchi bolalar uchun ixtisoslashtirilgan maktab-internatni borib ko‘rdi. Bu haqda Prezident matbuot xizmati xabar qildi.
Qayd etilishicha, mazkur ta’lim muassasasi 1966-yilda tashkil etilgan. 2016-yilda kapital ta’mirlangan. Ayni paytda bu yerda 221 nafar o‘quvchi tarbiyalanmoqda. Ularga oliy ma’lumotli defektolog va tarbiyachilar saboq bermoqda. O‘tgan yili 21 nafar bitiruvchidan 3 nafari oliy ta’lim muassasalariga o‘qishga kirgan.
Maktab-internatda 4 ta o‘quv binosi, 280 o‘rinli yotoqxona, oshxona, kutubxona, sport zali, faollar zali mavjud.
Davlat rahbari o‘qituvchilar bilan suhbatlashgan. Tarbiyalanuvchilarning mashg‘ulot jarayonlarini ko‘zdan kechirgan. Toshkent shahar hokimligiga maktab-internatning oshxonasi va texnologiya xonalarini ta’mirlash, sport kompleksi va ishlab chiqarish ustaxonasi tashkil etish bo‘yicha topshiriq bergan.
Xalq ta’limi vazirligiga “Zamin” jamg‘armasi bilan birga 2 ming 600 dan ziyod zaif eshituvchi bolalarni tibbiy tekshiruvdan o‘tkazib, ularni eshitish moslamalari bilan ta’minlash, eshitish qobiliyati tiklangan bolalarni bosqichma-bosqich umumta’lim maktablariga o‘tkazish vazifasi qo‘yilgan.
Mavzuga doir:
- O‘zbekistonda 2022-yilda Tibbiy-ijtimoiy xizmatlar agentligiga 31 mlrd so‘m ajratiladi
- O‘zbekistondagi barcha tug‘uruqxonalar eshitishni skrining tekshiruvchi uskunalar bilan jihozlanadi
- “2021-yilda nogironligi bo‘lgan 900 nafar bola protez-ortopediya moslamalari bilan ta’minlangan” — Shavkat Mirziyoyev
Izoh (0)