Шавкат Мирзиёев раислигида 8 апрель куни «Саховат», «Мурувват» ва «Меҳрибонлик» уйлари ҳамда махсус мактаб интернатлари фаолияти бўйича видеоселектор йиғилиши бўлиб ўтмоқда, деб хабар берди «Дарё» мухбири.
Қайд этилишича, президент 2021 йили янги жорий этилган маҳаллабай тизими ҳақида ҳам гапириб, Тошкент шаҳрининг барча туманлари ва маҳаллаларига вазирлар ва бошқа раҳбарларни бириктирилганини эслаб ўтди.
«Энди ушбу раҳбарларга ўзлари бириктирилган туман ва маҳаллаларни ривожлантириш бўйича барча масалалар билан шуғулланиш, жумладан, ободончилик, озодалик ва кўкаламзорлаштиришни таъминлаш, аҳолининг бўш вақтини мазмунли ташкил этиш каби вазифаларни ҳам юклаймиз. Хусусан, улар ўз маҳаллаларида ҳар ҳафтада камида 1 марта таниқли санъаткорлар, ижодкорлар ва спортчилар иштирокида концерт, адабий ва ижодий учрашувларни ташкил этиши шарт», — деди президент.
Шунингдек, президент ҳар ойда ўзига бириктирилган маҳаллалардаги камида 10 та эҳтиёжманд нуронийларни Самарқанд, Бухоро ва Хива каби туризм марказларига саёҳатга олиб боришни уюштириш лозимлигини айтди.
«Ҳар йили камида 10 нафар эҳтиёжманд нуронийни санаторийда даволанишини таъминлаши ҳам керак бўлади. Албатта, бу ишларни улар ўз идораларининг фойдаси ва қўшимча маблағлари ҳисобидан ташкил этадилар. Бундан ташқари, ушбу раҳбарлар мамлакатимизда 1 мартда бошланган ‘Яшил йиллик’ умумхалқ ҳаракатига ўз маҳалласи аҳолисини фаол жалб этиб, уни ҳақиқий маънода ‘Яшил макон’га айлантиришни таъминлаши керак», — деди Шавкат Мирзиёев.
Давлат раҳбари бунинг учун ҳар бир маҳаллада кўчалар ва ариқлар бўйлари, кўп қаватли уйлар атрофига камида 2 минг туп мевали ва манзарали дарахтлар, 3-5 минг дона терак қаламчалари ва камида 15 минг дона гул кўчатлари экишни ташкил этиш зарурлигини таъкидлади.
Изоҳ (0)