Fuqarolik holati dalolatnomalarini yozish organlari (FHDY) xizmatidan ko‘pchilik, jumladan, nogironligi bo‘lgan shaxslar ham foydalanadi. Toshkent shahar Mirzo Ulug‘bek tumani FHDY binosiga kirish uchun o‘rnatilgan nogironlar aravachasi yo‘lagi to‘sib qo‘yilganiga guvoh bo‘lindi. Bu holatga izoh olish maqsadida “Daryo” muxbiri FHDY mudiri qabulida bo‘ldi.
Mudir Luiza Mahmudbekovaning aytishicha, bino katta yo‘l yoqasida joylashgani bois asosiy kirish eshigidan emas, balki orqa tarafdagi eshikdan foydalaniladi.
“Yo‘lak payvandlab berkitib qo‘yilganidan xabarim yo‘q. Bizga nogironlar kamdan kam hollarda keladi. Agar kelsa, o‘zim pastga tushib, uning shaxsini tasdiqlovchi hujjati bilan tanishib, kerakli qog‘ozga imzo qo‘yib beraman. Bir marta 70 yoshlar atrofidagi fuqaro kelganida chiqib tushishga qiynalishini aytgandi. O‘shanda o‘zim pasga tushib xizmat ko‘rsatganman. Agar nogiron bo‘lgan shaxslar portal orqali murojaat qilsa, ularning uyiga ham borib kelishimiz mumkin”, – dedi Luiza Mahmudbekova.
FHDYga nogironlar uchun alohida aravacha ajratilgan. Lekin o‘sha aravacha yuradigan yo‘l yopiq. Bu mantiqsizlik haqidagi savolni Luiza Mahmudbekova javobsiz qoldirdi.
Mudir muxbir bilan suhbat so‘ngida nogironlar yo‘lagini ochib qo‘yilishini aytgan edi. Lekin oradan 10 kun vaqt o‘tgan bo‘lsa-da, yo‘lak haligacha berkitilgan holda qolmoqda.
“O‘zbekiston Respublikasida nogironlarni ijtimoiy himoya qilish to‘g‘risida”gi qonunning 9-moddasiga ko‘ra, aholi punktlarini loyihalash va qurish, transport vositalari, aloqa va axborot vositalarini yaratish hamda ishlab chiqarishda nogironlarning ehtiyojlarini hisobga olish shartligi ko‘rsatib o‘tilgan.
Ushbu qonunning 10-moddasida umumiy foydalanishdagi transport, aloqaning, axborotning ishlatilayotgan vositalari hamda ijtimoiy infrastrukturaning boshqa obyektlari (8 va 9-moddalar) davlat hokimiyati va boshqaruvi idoralari tomonidan nogironlarning jamoat birlashmalari ishtirokida belgilab qo‘yiladigan tartibda va shartlarda nogironlar kirishi va foydalanishi uchun moslashtirilishi zarurligi ko‘rsatib o‘tilgan. Mazkur obyektlarni nogironlar kirishi uchun moslashtirish mumkin bo‘lmagan hollarda tegishli korxonalar, muassasalar va tashkilotlar tomonidan nogironlarning ehtiyojlari qondirilishini ta’minlaydigan zarur choralari ishlab chiqilishi va amalga oshirilishi kerak.
Agar shunday talablar bajarilmasa, Ma’muriy javobgarlik to‘g‘risidagi kodeksning 511-moddasiga ko‘ra, nogironlar ijtimoiy infratuzilma obyektlariga to‘sqinliksiz kirishi uchun, shuningdek temir yo‘l, havo, suv, shaharlararo avtomobil transportidan, shahar va shahar atrofiga qatnaydigan yo‘lovchilar transportining barcha turlaridan, transport kommunikatsiyalaridan, umumiy foydalanishdagi aloqa va axborot vositalaridan to‘sqinliksiz foydalanishi uchun sharoitlar yaratish bo‘yicha talablarni bajarmaslik — mansabdor shaxslarga bazaviy hisoblash miqdorining o‘n baravaridan o‘n besh baravarigacha miqdorda jarima solishga sabab bo‘ladi.
Izoh (0)